نئی دہلی، 02 اگست (ہ س)۔

مرکزی وزیر مملکت برائے سائنس و ٹیکنالوجی (آزادانہ چارج) ڈاکٹر جتیندر سنگھ نے جموں و کشمیر کے ضلع کٹھوعہ میں مجوزہ اُجھ کثیر المقاصد منصوبے کی پیش رفت اور مرحلہ وار نفاذ کا جائزہ لیا۔ اس منصوبے سے تقریباً 90 ہزار ہیکٹر زرعی اراضی کو آبپاشی کی سہولت فراہم ہوگی اور ضلع کٹھوعہ کو پینے کا پانی بھی دستیاب ہوگا۔ اس کے علاوہ پنجاب کے پٹھانکوٹ اور گرداس پور اضلاع کو بھی آبپاشی کا فائدہ پہنچے گا۔ منصوبے سے 186 سے 212 میگاواٹ بجلی پیدا کرنے کا ہدف مقرر کیا گیا ہے۔

مرکزی وزارت سائنس کے مطابق اجلاس میں واپکاس لمیٹڈ کے حکام نے بتایا کہ منصوبے کو مرحلہ وار نافذ کیا جا رہا ہے۔ زمین کے حصول کی باقی کارروائی مکمل ہوتے ہی کام شروع کر دیا جائے گا۔ وزیر نے ایجنسی کو ہدایت دی کہ معیار، حفاظت اور کارکردگی کو برقرار رکھتے ہوئے جدید اور اختراعی حل اختیار کیے جائیں۔

ڈاکٹر جتیندر سنگھ نے کہا کہ وزیر اعظم نریندر مودی کی قیادت میں طویل عرصے سے التوا کا شکار قومی منصوبوں کو تیزی سے آگے بڑھایا جا رہا ہے۔ انہوں نے کہا کہ اُجھ منصوبہ تقریباً ایک صدی قبل تصور کیا گیا تھا لیکن کئی دہائیوں تک تعطل کا شکار رہا۔ اسی طرح شاہ پورکنڈی منصوبہ بھی تقریباً چالیس برس تک زیر التوا رہا، جس کے باعث راوی کا پانی پاکستان کی جانب بہتا رہا۔

انہوں نے کہا کہ 2019 میں شاہ پورکنڈی منصوبے کو دوبارہ شروع کیا گیا، جو اب تقریباً مکمل ہو چکا ہے۔ 2026 میں اُجھ منصوبے کی بحالی اس بات کا ثبوت ہے کہ حکومت ملک کے آبی وسائل کا بہترین استعمال کرتے ہوئے عوام کو حقیقی فائدہ پہنچانے کے لیے پرعزم ہے۔

انہوں نے مزید کہا کہ یہ منصوبہ راوی ندی کی معاون اُجھ ندی پر واقع ہے اور اس سے سرحدی علاقوں میں پانی کے بہاؤ کو منظم کرنے اور دراندازی کے ممکنہ راستوں کو محدود کرنے میں بھی مدد ملے گی۔

ہندوستھان سماچار

ہندوستان سماچار / عطاءاللہ