بیکانیر، 02 اگست (ہ س)۔ یوم آزادی سے پہلے، بھارت-پاکستان بین الاقوامی سرحد سے متصل ضلع بیکانیر کے کھاجو والا علاقے میں پولیس نے آپریشن 'شاک ویو' کے تحت منشیات اور ہتھیاروں کی ایک بڑی کھیپ کی بازیابی کے ساتھ ایک بین الاقوامی اسمگلنگ نیٹ ورک کا کھوج لگایا ہے۔ برآمد شدہ ہیروئن کی بین الاقوامی مارکیٹ میں تخمینہ قیمت تقریبا 50 کروڑ روپے ہے۔ اس معاملے میں اسمگلر وریندر کو گرفتار کر لیا گیا ہے۔

بیکانیر کے سپرنٹنڈنٹ آف پولیس مردل کچاوا نے بتایا کہ بیکانیر رینج کے انسپکٹر جنرل آف پولیس اوم پرکاش کی ہدایت پر ڈی ایس ٹی اور کھاجو والا پولیس اسٹیشن کی پولیس نے مشترکہ کارروائی میں کھاجو والا پولیس اسٹیشن کے علاقے کے تحت 32 ہیڈ پر واقع چک 6 بی ڈی روڈ روٹ پر چھاپہ مارا۔ وہاں سے ملزم کو تقریبا 10 کلوگرام ہیروئن، غیر ملکی ہتھیاروں کا ذخیرہ اور ایک موٹر سائیکل کے ساتھ گرفتار کیا گیا۔ انہوں نے بتایا کہ ملزم کے قبضے سے دو ترک ساختہ زیگانا پستول، چار گلوک پستول، پانچ ستارہ نشانات برآمد ہوئے۔ ایک 30 بور پستول، 22 میگزین اور 100 زندہ کارتوس برآمد کیے گئے ہیں۔ اس کے علاوہ، 999 افغان نشان کی تقریبا 10 کلو ہیروئن بھی ضبط کی گئی ہے۔

مردل کچاوا نے کہا کہ یوم آزادی سے قبل پاکستان کی طرف سے ڈرون کے ذریعے بھارت کو منشیات اور ہتھیار پہنچانے کی سازش کی گئی تھی۔ بیکانیر پولیس انٹیلی جنس ان پٹ کی مسلسل نگرانی کر رہی تھی۔ اسی بنیاد پر آپریشن شاک ویو شروع کیا گیا۔ انہوں نے کہا کہ ایڈیشنل سپرنٹنڈنٹ آف پولیس (دیہی) بنواری لال مینا، کھاجو والا اسٹیشن ہاو¿س آفیسر اشوک بشنوئی، سائبر ماہرین دیپک یادو، شری رام اور ڈی ایس ٹی اور کھاجو والا پولیس اسٹیشن کی ایک ٹیم نے پورے آپریشن میں اہم کردار ادا کیا۔ پولیس اب گرفتار ملزم سے پوچھ گچھ کی بنیاد پر اسمگلنگ کے پورے نیٹ ورک اور سرحد پار روابط کی مکمل تحقیقات کر رہی ہے۔

ہندوستھان سماچار

---------------

ہندوستان سماچار / عبدالسلام صدیقی