نئی دہلی، 2 اگست ( ہ س) : غیر ملکی شہریوں کی جانب سے ویزا کی خلاف ورزیوں کے خلاف ایک بڑی کاروائی کے تحت سنٹرل ڈسٹرکٹ اسپیشل اسٹاف کے فارنرز سیل نے آپریشن 'وسٹا 1.0' (ویزا اسٹیٹس ویریفکیشن) کے دوران چھ بنگلہ دیشی شہریوں کو گرفتار کیا ہے۔

تحقیقات سے پتہ چلا کہ سبھی ڈبل انٹری ویزا پر ہندوستان آئے تھے لیکن ہر دورے کے لیے مقرر کردہ زیادہ سے زیادہ 15 دن کی مدت ختم ہونے کے بعد بھی وہ بغیر اجازت کے ہندوستان میں مقیم تھے۔ اس کے بعد ایف آر آر او کے ذریعے ان کے خلاف قانونی کارروائی شروع کی گئی ہے۔ گرفتار افراد کی شناخت شفیع امام نفیس صدیق (31)، یحی احتشام (31)، آصف ملا (21)، محمد بلبل حسین (20)، حسن شیخ (24) اور ایک 21 سالہ خاتون کے طور پر ہوئی ہے۔ ان میں سے دو کا تعلق سلہٹ، دو کا گوپال گنج اور دو کا تعلق سراج گنج (بنگلہ دیش) سے ہے۔

ڈپٹی کمشنر آف پولیس، سنٹرل ڈسٹرکٹ، روہت راجبیر سنگھ نے اتوار کو بتایا کہ ضلع کے فارنر سیل نے غیر ملکی شہریوں کی رہائش کے لیے ہوٹلوں، گیسٹ ہاؤس اور دیگر مقامات پر خصوصی تصدیق مہم چلائی۔ اس دوران، چھ بنگلہ دیشی شہری نبی کریم کے ایک ہوٹل میں ٹھہرے پائے گئے۔ ٹیم نے ان کے پاسپورٹ، ویزا اور امیگریشن ریکارڈ کی جانچ پڑتال کی اور پتہ چلا کہ ان سب کے پاس درست ہندوستانی ڈبل انٹری ویزا ہے، لیکن ویزا کی شرائط ہر بار ہندوستان میں زیادہ سے زیادہ 15 دن رہنے کی اجازت دیتی ہیں۔ سبھی اس مقررہ مدت کے بعد بھی ہندوستان میں رہے۔

پوچھ گچھ کے دوران تمام غیر ملکی شہریوں نے اعتراف کیا کہ وہ درست ویزا پر ہندوستان آئے تھے اور سینٹرل دہلی ضلع کے ہوٹل میں قیام پذیر تھے۔ پولیس نے ان کے سفری دستاویزات اور امیگریشن ریکارڈ سے ملنے کے بعد ویزا کی شرائط کی خلاف ورزی کی تصدیق کی۔ اس کے بعد ان سب کو ایف آر آر او کے سامنے پیش کیا گیا جہاں ان کے خلاف قانونی کارروائی شروع کرنے کے پابندیوں کے احکامات جاری کیے گئے۔ اس وقت تمام چھ بنگلہ دیشی شہریوں کو سیوا دھام حراستی مرکز، سرائے روہیلا بھیج دیا گیا ہے۔ جہاں انہیں ملک بدری کا عمل مکمل ہونے تک رکھا جائے گا۔

اس کے ساتھ ہی تحقیقات میں اب تک ہندوستان میں کسی بھی ملزم کا کوئی مجرمانہ ریکارڈ سامنے نہیں آیا ہے۔ پولیس حکام کے مطابق یہ کارروائی صرف ویزا کی شرائط کی خلاف ورزی کرتے ہوئے ہندوستان میں زیادہ قیام کرنے کی صورت میں کی گئی ہے۔

ہندوستھان سماچار

--------

ہندوستان سماچار / عبدالواحد