نئی دہلی، 19 اگست (ہ س): مرکزی وزیر تجارت و صنعت پیوش گوئل ہندوستان اور سنگاپور کے درمیان تجارتی اور سرمایہ کاری کے تعلقات کو مضبوط بنانے کے مقصد سے 70 رکنی کاروباری وفد کے ساتھ آج سنگاپور کے دورے پر روانہ ہوگئے۔
وزارت تجارت و صنعت نے بدھ کو ایک بیان میں بتایا کہ پیوش گوئل کا تین روزہ سرکاری دورہ 19 اگست سے شروع ہوا ہے۔ وزیر تجارت اس دورے کے دوران بھارت-سنگاپور وزارتی سطح کی گول میز کانفرنس (آئی ایس ایم آر) اور چوتھی بھارت-سنگاپور بزنس گول میز کانفرنس میں شرکت کریں گے۔
وزارت کے مطابق گوئل 20 اگست کو وزیر خزانہ نرملا سیتارمن، وزیر خارجہ ایس جے شنکر، وزیر ریلوے، اطلاعات و نشریات اور الیکٹرانکس و انفارمیشن ٹیکنالوجی اشونی ویشنو کے ساتھ چوتھی بھارت-سنگاپور وزارتی سطح کی گول میز میٹنگ (آئی ایس ایم آر) میں شرکت کریں گے۔ وزارت تجارت نے بتایا کہ دورے کے دوران وزیر سنگاپور کے اپنے ہم منصبوں اور دیگر سینئر رہنماؤں کے ساتھ بات چیت کریں گے۔
گوئل کے ساتھ جانے والے کاروباری وفد میں مصنوعی ذہانت (اے آئی)، مینوفیکچرنگ، بنیادی ڈھانچے، مالیاتی خدمات، صحت خدمات، خوراک و زراعت، لاجسٹکس، بحری شعبے اور تجارت سے وابستہ نمائندے شامل ہیں۔ مذاکرات میں شراکت داری، سرمایہ کاری، مارکیٹ تک رسائی، ٹیکنالوجی تعاون اور ہنرمند افرادی قوت کی ترقی پر توجہ دی جائے گی۔
سنگاپور ہندوستان کا ایک اہم اقتصادی شراکت دار اور سرمایہ کاری کا بڑا ذریعہ بنا ہوا ہے۔ مالی سال 26-2025 میں سنگاپور 19.8 ارب ڈالر کی سرمایہ کاری کے ساتھ ہندوستان میں براہ راست غیر ملکی سرمایہ کاری (ایف ڈی آئی) کا سب سے بڑا ذریعہ رہا ہے۔ اپریل 2000 سے مارچ 2026 کے درمیان سنگاپور سے مجموعی ایف ڈی آئی کا بہاؤ 194.68 ارب ڈالر رہا، جو ہندوستان میں کل ایف ڈی آئی بہاؤ کا 24.72 فیصد ہے۔
ہندوستان-سنگاپور جامع اقتصادی تعاون معاہدے (سی ای سی اے) کے بعد دونوں ممالک کے درمیان دو طرفہ تجارت میں نمایاں اضافہ ہوا ہے۔ یہ مالی سال 05-2004 کے 6.7 ارب ڈالر سے بڑھ کر مالی سال 26-2025 میں 36.1 ارب ڈالر ہوگئی ہے۔
قابل ذکر ہے کہ سنگاپور جنوب مشرقی ایشیائی ممالک کی تنظیم (آسیان) میں ہندوستان کا سب سے بڑا تجارتی شراکت دار بھی ہے۔ اس کے علاوہ وہ بیرونی تجارتی قرضوں (ای سی بی) اور غیر ملکی پورٹ فولیو سرمایہ کاری کا بھی ایک اہم ذریعہ ہے۔
ہندوستھان سماچار
---------------
ہندوستان سماچار / عبدالواحد
