کولکاتا، 10 اگست(ہ س)۔ ترنمول کانگریس کے ممبران اسمبلی نے پیر کے روز مغربی بنگال اسمبلی کے احاطے میں سابق وزیر اعلی ممتا بنرجی کے قافلے پر اتوار کو شمالی 24 پرگنہ ضلع کے حالی شہر میں ہونے والے حملے کے خلاف احتجاج کیا۔ ممبران نے حکومت اور پولیس انتظامیہ کے خلاف نعرے لگائے۔ انہوں نے ممتا بنرجی کے لیے انصاف کا مطالبہ کرتے ہوئے پیر کو ریاست بھر میں احتجاجی ریلیاں نکالنے کا بھی اعلان کیا۔

احتجاج کی قیادت سینئر لیڈروں سوبن دیب چٹوپادھیائے، کنال گھوش، بمان بنرجی، نینا بندیوپادھیائے اور دیگر ممبران اسمبلی نے کی۔ احتجاج کرنے والے ممبران نے ممتا بنرجی پر حملے کی مذمت کرنے والے بینرز اور پوسٹر اٹھائے ہوئے تھے۔ممبران نے حالی شہر میں پولیس حراست میں ترنمول کانگریس کے ایک کارکن کی موت پر پولیس انتظامیہ سوال بھی اٹھایا۔

پارٹی کے مطابق ریاست کے تمام بلاکوں میں احتجاجی ریلیاں نکالی جائیں گی۔ پارٹی کے ایک رہنما کے مطابق، ترنمول کانگریس اتوار کو حالی شہر میں پیش آنے والے واقعے کو مرکز بنا کر مغربی بنگال میں اپنے احتجاج کو تیز کرنے کی تیاری کر رہی ہے۔

یہ معاملہ کنچراپارہ میونسپلٹی کے وارڈ نمبر 23 کے سابق ترنمول کانگریس کونسلر کے شوہر ورجو کیوٹ کی حالی شہر پولیس اسٹیشن کی طرف سے گرفتاری سے متعلق ہے۔ پولیس نے اسے جبری وصولی سمیت مختلف الزامات کے تحت گرفتار کیا تھا۔ جمعہ کو اسے عدالت میں پیش کیا گیا جہاں جج نے پانچ دن کی پولیس حراست کا حکم دیاتھا۔

تاہم سنیچر کو ورجو کی پولیس حراست میں موت سامنے آئی۔ اس کی بیوی جینی نے الزام لگایا کہ اس کے شوہر کی موت پولیس حراست کے دوران لاک اپ کے اندر مار پیٹ کی وجہ سے ہوئی۔

اتوار کو ٹی ایم سی کی سربراہ ممتا بنرجی متوفی ٹی ایم سی کارکن ورجو کے اہل خانہ سے ملنے کے لیے کنچراپارہ جا رہی تھیں۔ ان کے ساتھ لوک سبھا کے رکن پارلیمنٹ کلیان بنرجی اور راجیہ سبھا کے رکن پارلیمنٹ ڈولا سین بھی تھے۔ اس دوران انہیں راستے میں احتجاج کا سامنا کرنا پڑا۔

الزام ہے کہ مظاہرین نے ممتا بنرجی کی گاڑی پر جوتے اور کیچڑ پھینکے۔ ممتا بنرجی نے الزام لگایا کہ اس واقعے کے پیچھے بی جے پی کی حمایت یافتہ شرپسندوں کا ہاتھ ہے۔ ان کی گاڑی پر اینٹوں اور پتھروں کے پھینکے جانے کے بھی الزامات ہیں۔ ممتا بنرجی نے کہا کہ اگر اس وقت کار کی کھڑکیاں کھلی ہوتیں تو انہیں سر پر شدید چوٹیں لگ سکتی تھیں اور یہاں تک کہ ان کی جان بھی جا سکتی تھی۔

ہندوستھان سماچار

---------------

ہندوستان سماچار / عبدالسلام صدیقی