مطالبات پورے ہونے تک تحریک جاری رہے گی: دیویندر ناتھ مہتو

رانچی، 10 اگست (ہ س)۔

جے پی ایس سی-جے ایس ایس سی سمیت دیگر مسابقتی امتحانات میں مبینہ بے ضابطگیوں اور دھاندلی کے خلاف طلبہ کی ستیہ گرہ تحریک پیر کو 17ویں دن اور بھوک ہڑتال نویں دن میں داخل ہوگئی۔ اسی دوران طلبہ رہنما دیویندر ناتھ مہتو جے پال سنگھ اسٹیڈیم سے ایمبولینس کے ذریعے براہ راست اسمبلی گھیراو¿ مارچ میں شامل ہونے پہنچے۔

ایمبولینس سے اترتے ہی پرجوش طلبہ امیدواروں اور حامیوں نے دیویندر ناتھ مہتو کو اپنے کندھوں پر اٹھا لیا اور انہیں مارچ میں آگے لے کر بڑھے۔ اس دوران طلبہ میں خاصا جوش و خروش نظر آیا۔

دیویندر ناتھ مہتو نے کہا کہ جب تک حکومت طلبہ کے مطالبات کو مکمل طور پر نافذ نہیں کرتی، تب تک تحریک جاری رہے گی۔ انہوں نے دعویٰ کیا کہ اسمبلی گھیراو¿ میں جھارکھنڈ کے علاوہ ریاست سے باہر رہنے والے لوگ بھی شرکت کے لیے پہنچے ہیں۔ انہوں نے کہا کہ یہ تحریک طلبہ کی جدوجہد کی تاریخ میں ایک اہم سنگ میل کے طور پر یاد کی جائے گی۔

مہتو نے الزام عائد کیا کہ طلبہ گزشتہ 17 دنوں سے صبر و تحمل کے ساتھ جے پال سنگھ اسٹیڈیم میں ستیہ گرہ کر رہے ہیں اور حکومت سے اپنے مطالبات پر غور کرنے کی اپیل کر رہے ہیں، لیکن اب تک ان کے مطالبات پر کوئی مثبت پیش رفت نہیں ہوئی ہے۔

انہوں نے کہا کہ طلبہ اپنے حقوق کے لیے جدوجہد کر رہے ہیں، جبکہ ریاستی حکومت ان کی آواز دبانے کی کوشش کر رہی ہے۔ انہوں نے اسے قابل مذمت قرار دیتے ہوئے کہا کہ حکومت کو طلبہ کے مطالبات کو نظرانداز کرنے کے بجائے ان سے بات چیت کرنی چاہیے۔

مہتو نے کہا کہ نوجوان توانائی سے بھرپور ہوتے ہیں، لیکن اس کے باوجود تحریک کے دوران طلبہ امیدواروں نے حکومت کے خلاف کوئی فحش یا قابل اعتراض نعرے نہیں لگائے۔ اس کے باوجود طلبہ کے تئیں حکومت کا رویہ ایسا ہے جیسے وہ اس کے دشمن ہوں۔ انہوں نے اسے غلط قرار دیا۔

اسمبلی کے اطراف کی گئی بیریکیڈنگ اور لگائے گئے نوکیلے خاردار تاروں پر بھی دیویندر ناتھ مہتو نے سوال اٹھائے۔ انہوں نے کہا کہ اسمبلی کے آس پاس اور وہاں تک آنے والی سڑکوں پر جس طرح کی سکیورٹی انتظامات کیے گئے ہیں، اس سے ایسا لگ رہا ہے جیسے اسے سرحدی علاقہ بنا دیا گیا ہو۔

انہوں نے کہا کہ نوکیلے تار، بیریکیڈنگ یا کسی بھی طرح کی رکاوٹ طلبہ کو ان کی منزل تک پہنچنے سے نہیں روک سکتی۔ مہتو نے دعویٰ کیا کہ اسمبلی گھیراو¿ کے اس دن اور حکومت کی مبینہ کارروائی کو پورا ملک دیکھ رہا ہے۔

انہوں نے ایک بار پھر کہا کہ طلبہ کے مطالبات پورے ہونے تک ان کی ستیہ گرہ اور تحریک جاری رہے گی۔

ہندوستھان سماچار

ہندوستان سماچار / عطاءاللہ