نئی دہلی، 10 اگست (ہ س)۔
مرکزی حکومت نے پیر کو لوک سبھا میں بتایا کہ سپریم کورٹ کی ہدایت کے مطابق آر ٹی ای ایکٹ کے دائرے میں آنے والے اسکولوں میں بطور استاد تقرری کے لیے ٹیچر اہلیت ٹیسٹ (ٹی ای ٹی) لازمی کم از کم اہلیت ہے۔ اہل اساتذہ کو مقررہ مدت کے اندر ٹی ای ٹی کی اہلیت حاصل کرنا ہوگی۔
وزیر مملکت برائے تعلیم جینت چودھری نے لوک سبھا میں ایک سوال کے تحریری جواب میں بتایا کہ سپریم کورٹ نے یکم ستمبر 2025 کے اپنے فیصلے میں ٹی ای ٹی کو بچوں کے مفت اور لازمی تعلیم کے حق (آر ٹی ای) ایکٹ، 2009 کی دفعہ 23 کے تحت مقررہ کم از کم اہلیت میں شامل قرار دیا تھا۔ عدالت نے اہل اساتذہ کو مقررہ مدت کے اندر ٹی ای ٹی پاس کرنے کی ہدایت دی تھی۔
بعد ازاں 29 مئی 2026 کو نظرثانی درخواستوں کا نپٹارہ کرتے ہوئے سپریم کورٹ نے ٹی ای ٹی کی اہلیت حاصل کرنے کی آخری تاریخ 31 اگست 2027 سے بڑھا کر 31 اگست 2028 کر دی۔ عدالت نے متعلقہ حکومتوں اور حکام سے کہا کہ ٹی ای ٹی کا باقاعدگی سے، ترجیحاً سال میں دو مرتبہ، انعقاد کرنے کی کوشش کی جائے، تاکہ اہل اساتذہ کو کم از کم اہلیت حاصل کرنے کے لیے مناسب مواقع مل سکیں۔
سپریم کورٹ نے آر ٹی ای ایکٹ نافذ ہونے سے قبل مقرر کیے گئے ان حاضر سروس اساتذہ کی عملی مشکلات کو بھی مدنظر رکھا، جن کی ریٹائرمنٹ میں پانچ سال سے کم وقت باقی تھا۔ آئین کے آرٹیکل 142 کے تحت عدالت نے ایسے اساتذہ کو ٹی ای ٹی کی اہلیت حاصل کیے بغیر ریٹائرمنٹ کی عمر تک ملازمت جاری رکھنے کی اجازت دی ہے۔
ہندوستھانسماچار
ہندوستان سماچار / عطاءاللہ
