دہرادون، 30 جولائی (ہ س )۔ اتراکھنڈ میں جمعرات کو بھی مانسون کا اثر برقرار ہے۔ محکمہ موسمیات نے ریاست کے بیشتر علاقوں میں ہلکی سے درمیانی بارش اور گرج چمک کے ساتھ بونداباندی کا امکان ظاہر کیا ہے۔ رودرپریاگ، چمولی، باگیشور، نینی تال، چمپاوت اور پتھورا گڑھ اضلاع میں بعض مقامات پر شدید سے بہت شدید بارش کی وارننگ جاری کی گئی ہے۔

محکمہ موسمیات کے مطابق ان چھ اضلاع میں گرج چمک، آسمانی بجلی گرنے اور انتہائی تیز بارش کے دور آنے کا امکان ہے۔ ریاست کے دیگر اضلاع میں بھی بعض مقامات پر شدید بارش ہو سکتی ہے۔

محکمہ نے لوگوں سے اپیل کی ہے کہ وہ زمین کے تودے کھکسنے کے خطرے والے علاقوں میں غیر ضروری آمد و رفت سے گریز کریں، ندی نالوں کے کنارے نہ جائیں اور ضلع انتظامیہ کی جانب سے جاری کردہ ہدایات پر عمل کریں۔

دارالحکومت دہرادون میں دن بھر جزوی سے عمومی طور پر بادل چھائے رہنے، ہلکی سے درمیانی بارش کے ایک یا دو دور اور کچھ مقامات پر شدید بارش کا امکان ہے۔ زیادہ سے زیادہ درجہ حرارت تقریباً 30 ڈگری سیلسیس رہنے کا امکان ظاہر کیا گیا ہے۔

گزشتہ 24 گھنٹوں کے دوران سون پریاگ میں 138.5 ملی میٹر، نریندر نگر میں 72.5 ملی میٹر، پوکھری میں 69.5 ملی میٹر اور گوچر میں 61 ملی میٹر بارش ریکارڈ کی گئی۔

جمعرات کی صبح سے دہرادون سمیت ریاست کے کئی علاقوں میں مسلسل بارش ہو رہی ہے۔ بارش کے باعث درجہ حرارت میں کمی آئی ہے اور موسم خوشگوار ہو گیا ہے۔ گھنے بادلوں کے درمیان لوگ چھتریوں اور گرم کپڑوں کا سہارا لیتے نظر آئے۔ محکمہ موسمیات نے اگلے چند گھنٹوں تک کئی علاقوں میں بارش کا سلسلہ جاری رہنے کا امکان ظاہر کیا ہے۔

ہندوستھان سماچار

---------------

ہندوستان سماچار / عبدالواحد