گلاسگو، 30 جولائی (ہ س)۔ ہندوستان کے اسٹار لمبی کود کے کھلاڑی مرلی سری شنکر نے دولت مشترکہ کھیل 2026 میں شاندار کارکردگی کا مظاہرہ کرتے ہوئے مقامی وقت کے مطابق بدھ کے روز مردوں کی لمبی کود کے مقابلے میں چاندی کا تمغہ اپنے نام کیا۔ اس کے ساتھ ہی انہوں نے برمنگھم 2022 میں جیتے گئے چاندی کے تمغے کی کامیابی کو دہرایا اور مسلسل دوسری بار کامن ویلتھ گیمز کے پوڈیم پر جگہ بنائی۔

27 سالہ سری شنکر نے اپنی چھ کوششوں میں دوسری کوشش میں 8.09 میٹر کی چھلانگ لگائی، جو ان کی بہترین کارکردگی رہی۔ اگرچہ دو کوششیں فاول رہیں، لیکن پورے مقابلے میں وہ تمغے کی دوڑ میں برقرار رہے۔

سونے کا تمغہ جمیکا کے تین بار کے ورلڈ چیمپئن شپ کے تمغہ یافتہ تاجے گیل نے جیتا۔ گیل نے چوتھی کوشش میں 8.15 میٹر کی چھلانگ لگا کر مقابلے پر فیصلہ کن برتری حاصل کر لی۔ ان کی یہ کارکردگی پورے مقابلے کی بہترین کارکردگی رہی۔ اسکاٹ لینڈ کے اسٹیفن میکنزی نے پہلی ہی کوشش میں 8.08 میٹر کی چھلانگ لگا کر کانسے کا تمغہ حاصل کیا۔

ہندوستان کے ایک اور کھلاڑی لوکیش ستیہ ناتھن نے بھی اچھی کارکردگی کا مظاہرہ کرتے ہوئے 7.97 میٹر کی بہترین چھلانگ کے ساتھ پانچواں مقام حاصل کیا۔

سری شنکر پورے مقابلے کے دوران بہترین لے میں نظر آئے اور سونے کے تمغے کے مضبوط دعویدار بنے رہے، لیکن تجربہ کار جمیکن کھلاڑی تاجے گیل نے فیصلہ کن لمحات میں شاندار کارکردگی کا مظاہرہ کرتے ہوئے بازی مار لی۔

سری شنکر کا یہ چاندی کا تمغہ کامن ویلتھ گیمز 2026 میں ہندوستان کی ایتھلیٹکس مہم کے لیے ایک اور بڑی کامیابی ہے اور بین الاقوامی سطح پر ہندوستانی ایتھلیٹکس کی مسلسل بڑھتی ہوئی مضبوطی کا ثبوت بھی ہے۔

ہندوستھان سماچار

---------------

ہندوستان سماچار / انظر حسن