جموں, 30 جولائی (ہ س): وادی کشمیر میں آئندہ چند روز کے دوران کسی بڑی بارش کا امکان نہیں ہے، تاہم وقفے وقفے سے ہلکی بارش اور بوندا باندی کا سلسلہ جاری رہے گا۔ دوسری جانب جموں ڈویژن میں شدید بارش، اچانک سیلاب اور مٹی کے تودے گرنے کا خدشہ ظاہر کیا گیا ہے۔محکمہ موسمیات کے ڈائریکٹر مختار احمد نے جمعرات کو بتایا کہ وادی کشمیر میں مجموعی طور پر موسم ابر آلود رہے گا اور مختلف مقامات پر ہلکی بارش یا مختصر دورانیے کی بوندا باندی ہوسکتی ہے۔ انہوں نے کہا کہ یہ صورتحال تقریباً 5 اگست تک برقرار رہنے کا امکان ہے۔

انہوں نے بتایا کہ جمعرات کو وادی کشمیر اور جموں ڈویژن کے مختلف اضلاع میں بارش کا سلسلہ متوقع ہے، جبکہ چند مقامات پر تیز بارش بھی ہوسکتی ہے۔ ان کے مطابق جموں ڈویژن میں جمعہ کی علی الصبح شدید بارش کا امکان ہے، جبکہ 2 سے 4 اگست کے دوران بھی بارش کے مزید سلسلے متوقع ہیں۔مختار احمد نے خبردار کیا کہ شدید بارش کے باعث جموں ڈویژن کے حساس علاقوں میں لینڈ سلائیڈنگ، مٹی کے تودے گرنے، پتھر کھسکنے اور اچانک سیلاب آنے کا خطرہ ہے۔ انہوں نے مسافروں، سیاحوں اور ٹرانسپورٹروں کو مشورہ دیا کہ وہ خصوصاً چناب وادی، پیر پنجال خطے اور سری نگر۔جموں قومی شاہراہ پر سفر کے دوران احتیاط برتیں اور انتظامیہ و ٹریفک حکام کی جانب سے جاری ہدایات پر عمل کریں۔

محکمہ موسمیات کے ڈائریکٹر نے کہا کہ کسان اپنی معمول کی زرعی سرگرمیاں، بشمول اسپرے، کھاد کے استعمال اور کھیتوں کی تیاری، جاری رکھ سکتے ہیں۔ انہوں نے مزید بتایا کہ آئندہ دو ہفتوں کے دوران درجہ حرارت میں بتدریج اضافہ ہوگا، جبکہ 20 اگست کے بعد درجہ حرارت میں کمی شروع ہونے کے ساتھ ہی خزاں کے موسم کا آغاز متوقع ہے۔

ہندوستھان سماچار

---------------

ہندوستان سماچار / محمد اصغر