ہتک عزت معاملے میں عدالت نے ادھو ٹھاکرے اور ایکناتھ شندے کو جاری کئے سمن۔ 2009 کے کلیان لوک سبھا انتخاب سے متعلق مبینہ ترمیم شدہ ویڈیو کیس، 5 اور 6 اگست کو ذاتی طور پر پیش ہونے کی ہدایتممبئی، 30 جولائی (ہ س)۔ نیشنلسٹ کانگریس پارٹی (شرد پوار) کے رہنما اور مہاراشٹر قانون ساز کونسل کے سابق ڈپٹی چیئرمین وسنت شنکر داوکھرے کی جانب سے دائر ہتک عزت مقدمے میں کلیان ضلع عدالت نے جمعرات کو شیو سینا (ادھو بالاصاحب ٹھاکرے) کے سربراہ اور مہاراشٹر کے سابق وزیر اعلیٰ ادھو ٹھاکرے اور ریاست کے نائب وزیر اعلیٰ ایکناتھ شندے کو سمن جاری کیا ہے۔عدالت نے 2009 کے کلیان لوک سبھا انتخابات کے دوران مبینہ طور پر ترمیم شدہ ویڈیو دکھانے سے متعلق ہتک عزت مقدمے کی سماعت کے سلسلے میں ادھو ٹھاکرے کو 5 اگست اور ایکناتھ شندے کو 6 اگست کو ذاتی طور پر عدالت میں حاضر ہونے کی ہدایت دی ہے۔ یہ مقدمہ 2009 کے کلیان لوک سبھا انتخابات سے متعلق ہے، جب نیشنلسٹ کانگریس پارٹی کے امیدوار وسنت داوکھرے اور شیو سینا کے امیدوار آنند پرانجپے کے درمیان انتخابی تنازع سامنے آیا تھا۔الزام ہے کہ 22 اپریل 2009 کو ڈومبیولی میں منعقدہ ایک انتخابی جلسے کے دوران ادھو ٹھاکرے نے ایک ویڈیو دکھائی تھی، جس میں وسنت داوکھرے مبینہ طور پر اپنے کارکنوں سے انتخابات جیتنے کے لیے پولیس اور انتخابی حکام سے خوفزدہ نہ ہونے کی اپیل کرتے ہوئے نظر آ رہے تھے۔ اس وقت ایکناتھ شندے شیو سینا میں ادھو ٹھاکرے کے ساتھ تھے اور پارٹی میں تقسیم نہیں ہوئی تھی۔وسنت داوکھرے نے اس ویڈیو کو گمراہ کن قرار دیتے ہوئے دعویٰ کیا تھا کہ ان کی شبیہ کو نقصان پہنچانے کی نیت سے ویڈیو میں ترمیم کی گئی تھی۔ اس کے بعد انہوں نے کلیان ضلع عدالت میں ادھو ٹھاکرے، ایکناتھ شندے، آنند پرانجپے اور رماکانت دیولیکر کے خلاف ہتک عزت کا مقدمہ دائر کیا تھا۔ دوسری جانب شیو سینا نے اس ویڈیو کو اصلی قرار دیتے ہوئے اس کی شکایت انتخابی حکام سے کی تھی۔ اسی مقدمے کی سماعت کے دوران کلیان ضلع عدالت نے ادھو ٹھاکرے اور ایکناتھ شندے کو سمن جاری کرتے ہوئے مقررہ تاریخوں پر ذاتی طور پر عدالت میں حاضر ہونے کا حکم دیا ہے۔ہندوستھان سماچار--------------------

ہندوستان سماچار / جاوید این اے