جموں, 30 جولائی (ہ س)۔ ضلع انتظامیہ ادھم پور نے مسلسل بارش کے باعث لینڈ سلائیڈنگ کے خطرے کے پیش نظر 31 جولائی کو قومی شاہراہ نمبر 44 کے ادھم پور۔چنینی حصے پر ٹریفک کی مکمل آمدورفت معطل رکھنے کا حکم جاری کیا ہے۔
ایڈیشنل ڈسٹرکٹ مجسٹریٹ پریم سنگھ کی جانب سے جاری حکم نامے کے مطابق 18 جولائی سے جاری بارش کے باعث لڈھا، سمرولی کے مقام پر بار بار لینڈ سلائیڈنگ اور ملبہ گرنے کے واقعات پیش آ رہے ہیں، جس سے مسافروں اور بحالی کے کام میں مصروف عملے کی سلامتی کو خطرہ لاحق ہے۔
حکم نامے میں کہا گیا ہے کہ اگرچہ دو طرفہ ٹریفک بحال کر دی گئی ہے، تاہم متاثرہ پہاڑی ڈھلان کو مستقل طور پر محفوظ بنانے اور اوپر لٹکے ہوئے ڈھیلے پتھروں و ملبے کو بھاری مشینری کے ذریعے ہٹانے کے لیے 31 جولائی کو شاہراہ پر ٹریفک بند رکھنا ضروری ہے۔
انتظامیہ نے نیشنل ہائی ویز اتھارٹی آف انڈیا کو ہدایت دی ہے کہ اس دوران ملبہ ہٹانے، ڈھلان کو محفوظ بنانے اور شاہراہ کی بحالی کا کام تیزی سے مکمل کیا جائے تاکہ سڑک کو جلد از جلد محفوظ طریقے سے دوبارہ ٹریفک کے لیے کھولا جا سکے۔
ادھم پور اور رام بن پولیس، ٹریفک پولیس اور دیگر متعلقہ محکموں کو ٹریفک کے متبادل انتظامات، عوام کی رہنمائی اور احکامات پر سختی سے عمل درآمد کو یقینی بنانے کی ہدایت دی گئی ہے، جبکہ عوام سے اپیل کی گئی ہے کہ وہ 31 جولائی کو سفر سے قبل ٹریفک کی تازہ صورتحال معلوم کر کے ہی روانہ ہوں۔
ہندوستھان سماچار
---------------
ہندوستان سماچار / محمد اصغر
