احمد آباد، 30 جولائی (ہ س): احمد آباد میں جمعرات کی علی الصبح زلزلے کے ہلکے جھٹکے محسوس کیے گئے۔ گاندھی نگر میں واقع انسٹی ٹیوٹ آف سیسمولوجیکل ریسرچ (آئی ایس آر) کی جانب سے جاری معلومات کے مطابق جمعرات کی صبح 4:39 بجے ریکٹر اسکیل پر 2.6 شدت کا زلزلہ ریکارڈ کیا گیا۔

زلزلے کا مرکز احمد آباد شہر سے تقریباً 29 کلومیٹر جنوب، جنوب مغرب کی سمت واقع تھا۔ زلزلے کی گہرائی زمین کی سطح سے تقریباً 20 کلومیٹر ریکارڈ کی گئی، جس کے باعث بعض علاقوں میں ہلکی لرزش محسوس کی گئی۔

زلزلے کی شدت کم ہونے کے سبب کسی بھی قسم کی جانی نقصان، زخمی ہونے یا مالی نقصان کی کوئی اطلاع موصول نہیں ہوئی ہے۔ انتظامیہ اور متعلقہ ادارے صورتحال پر مسلسل نظر رکھے ہوئے ہیں۔ ابتدائی اطلاعات کے مطابق احمد آباد اور اس کے اطراف کے بعض پُرسکون علاقوں میں رہنے والے افراد نے چند سیکنڈ تک ہلکی لرزش محسوس کی، تاہم بیشتر لوگوں کو اس کا احساس بھی نہیں ہوا۔

ماہرینِ زلزلہ کے مطابق 2.6 شدت کا زلزلہ معمول کے درجے میں شمار کیا جاتا ہے اور اس سے عموماً کسی بڑے نقصان کا اندیشہ نہیں ہوتا۔ تاہم ماہرین کا کہنا ہے کہ زلزلہ کے تعلق

سے حساس علاقوں میں رہنے والے افراد کو ہمیشہ چوکس رہنا چاہیے اور محکمۂ ڈیزاسٹر مینجمنٹ کی جانب سے جاری کردہ ہدایات پر عمل کرنا چاہیے۔ فی الحال صورتحال مکمل طور پر معمول کے مطابق ہے اور تشویش کی کوئی بات نہیں بتائی گئی ہے۔

ہندوستھان سماچار

---------------

ہندوستان سماچار / عبدالواحد