احمد آباد، 30 جولائی (ہ س): بھارتی محکمۂ موسمیات (آئی ایم ڈی) نے جمعرات کو گجرات کے کئی اضلاع میں شدید سے انتہائی شدید بارش کی وارننگ جاری کی ہے۔ ممکنہ طور پر خراب موسم کی صورتحال کے پیش نظر ریاستی ایمرجنسی آپریشن سینٹر (ایس ای او سی) نے تمام ضلعی انتظامیہ کو ہائی الرٹ رہنے کی ہدایت دی ہے۔

آئی ایم ڈی نے بناس کانٹھا، سابر کانٹھا، اراولی، مہی ساگر، پنچ محل، داہود اور چھوٹا اُدے پور اضلاع کے لیے اورنج الرٹ جاری کیا ہے۔ ان علاقوں میں شدید سے انتہائی شدید بارش ہونے کا امکان ظاہر کیا گیا ہے۔

دوسری جانب پاٹن، مہسانہ، گاندھی نگر، احمد آباد، کھیڑا، آنند، وڈودرا، بھروچ، سورت، نرمدا، تاپی، ڈانگ، نوساری، ولساڈ اور دادرا و نگر حویلی میں یلو الرٹ نافذ کیا گیا ہے۔ ان علاقوں میں ہلکی سے درمیانی جبکہ بعض مقامات پر شدید بارش کا امکان ہے۔ فی الحال سوراشٹر اور کچھ کے علاقوں کو گرین زون میں رکھا گیا ہے۔

ممکنہ شدید بارش کے پیش نظر ایس ای او سی نے تمام اضلاع کے کلکٹروں اور ڈیزاسٹر مینجمنٹ حکام کو خصوصی احتیاطی اقدامات کرنے کی ہدایت دی ہے۔ سڑکوں کے کنارے جھکے ہوئے درختوں، خطرناک ہورڈنگز، کمزور بجلی کے کھمبوں اور عارضی ڈھانچوں کو فوری طور پر ہٹانے کے احکامات جاری کیے گئے ہیں۔ بوسیدہ عمارتوں میں رہائش پذیر افراد کو محفوظ مقامات یا راحتی کیمپوں میں منتقل کرنے اور انہیں خوراک و دیگر ضروری سہولتیں فراہم کرنے کی بھی ہدایت دی گئی ہے۔

اس کے علاوہ پانی سے متاثرہ کاز ویز اور خستہ حال پلوں پر گاڑیوں کی آمد و رفت روکنے، تمام محکموں کے 24 گھنٹے فعال کنٹرول روم قائم رکھنے، نیز آفات سے نمٹنے والے رضاکاروں (آفت متر)، ہوم گارڈ، جی آر ڈی، ایس آر ڈی، این سی سی، این ایس ایس، ریسکیو بوٹس، این ڈی آر ایف اور ایس ڈی آر ایف کی ٹیموں کو اسٹینڈ بائی رکھنے کے احکامات بھی جاری کیے گئے ہیں۔ انتظامیہ نے عوام سے اپیل کی ہے کہ وہ محکمۂ موسمیات کی وارننگ پر عمل کریں اور غیر ضروری سفر سے گریز کریں۔

ہندوستھان سماچار

---------------

ہندوستان سماچار / عبدالواحد