علی گڑھ, 30 جولائی (ہ س)۔
علی گڑھ کے چیف ڈیولپمنٹ آفیسر یوگیندر کمار کی صدارت میں وکاس بھون کے گاندھی سبھاگار میں گرام پنچایت ڈیولپمنٹ پلان (جی پی ڈی پی) کی تیاری کے سلسلے میں ایک روزہ ورکشاپ منعقد ہوئی۔ اس موقع پر لکھنؤ سے آئے ماسٹر ٹرینرز اشوک کمار اور وشنو پچوری نے گرام پنچایت ترقیاتی منصوبہ تیار کرنے کے طریقۂ کار، زمینی معائنہ اور پورٹل کے تکنیکی پہلوؤں پر تفصیلی رہنمائی فراہم کی۔
چیف ڈیولپمنٹ آفیسر یوگیندر کمار نے کہا کہ گرام پنچایتوں کی جامع ترقی کے لیے مضبوط اور مؤثر منصوبہ بندی ضروری ہے۔ انہوں نے ہدایت دی کہ منصوبہ تیار کرتے وقت 16ویں مالیاتی کمیشن کی نئی ہدایات کو مدنظر رکھا جائے اور پنچایتوں کو خود کفیل بنانے کے لیے او ایس آر (آن سورس ریوینیو) میں اضافہ پر خصوصی توجہ دی جائے تاکہ بنیادی سہولیات کو مزید بہتر بنایا جا سکے۔
اس موقع پر پنچایتی راج کے نائب ڈائریکٹر اوپیندر راج نے بتایا کہ اب گرام پنچایت ترقیاتی منصوبے پنچایت ایڈوانسڈ انڈیکس (پی آئی) کی بنیاد پر تیار کیے جائیں گے۔ انہوں نے بتایا کہ مالی سال 2023-24 میں گنگیری بلاک کی مداپور گرام پنچایت نے 75.76 فیصد نمبر حاصل کرکے ضلع میں پہلی پوزیشن حاصل کی۔ انہوں نے مزید کہا کہ حکومت کی جانب سے غربت سے پاک، صحت مند، بچوں کے لیے سازگار، صاف و سرسبز، پانی کی دستیابی، روزگار، سماجی انصاف، بہتر حکمرانی اور خواتین دوست پنچایت سمیت نو موضوعات پر خصوصی توجہ دی جا رہی ہے۔
ورکشاپ میں ضلع کے مختلف محکموں کے افسران، تمام بلاک ڈیولپمنٹ آفیسرز (بی ڈی او)، اے ڈی او پنچایت اور دیگر متعلقہ افسران نے شرکت کی۔
---------------
ہندوستان سماچار / سید کامران علی گڑھ
