ممبئی ، 30 جولائی (ہ س)۔ تمباکو سے متعلق ممنوعہ اشیا کے خلاف کارروائی کرتے ہوئے پالگھر پولیس نے گجرات سے ممبئی منتقل کیا جا رہا 27 لاکھ 93 ہزار 796 روپے مالیت کا کیسر ملا ممنوعہ پان مسالہ ضبط کر لیا۔ اس معاملے میں دو ملزمان کو گرفتار کیا گیا ہے، جبکہ 20 لاکھ روپے مالیت کا ایک آئشر ٹیمپو بھی ضبط کیا گیا۔ پولیس کے مطابق ضبط کیے گئے مجموعی مال کی مالیت 47 لاکھ 93 ہزار 796 روپے ہے۔پولیس کے مطابق ضلع میں غیر قانونی کاروبار کے خلاف پولیس سپرنٹنڈنٹ یتیش دیشمکھ کی ہدایت پر خصوصی مہم چلائی جا رہی ہے۔ اسی سلسلے میں مقامی کرائم برانچ کے اہلکار تلاسری علاقے میں گشت کر رہے تھے کہ انہیں خفیہ اطلاع ملی کہ ایک آئشر ٹیمپو کے ذریعے گجرات سے ممبئی کی جانب ممنوعہ کیسر ملا پان مسالہ منتقل کیا جا رہا ہے۔ اطلاع کی بنیاد پر مقامی کرائم برانچ اور تلاسری پولیس کی مشترکہ ٹیم نے ممبئی۔احمد آباد قومی شاہراہ پر مذکورہ ٹیمپو کو روک کر اس کی تلاشی لی۔ تلاشی کے دوران آلو کی بوریوں کے پیچھے چھپا کر رکھا گیا ممنوعہ کیسر ملا پان مسالہ برآمد کر لیا گیا۔پولیس نے ٹیمپو کے ڈرائیور سنجے کمار رجونتا کیوٹ، عمر 42 سال، اور محمد اشراق احمد محمد شمیم انصاری، عمر 28 سال، کو گرفتار کر لیا۔ یہ کارروائی مقامی کرائم برانچ کے سینئر پولیس انسپکٹر پردیپ پاٹل اور تلاسری کے سینئر پولیس انسپکٹر ستیش گورڈ کی نگرانی میں انجام دی گئی، جبکہ مقدمے کی مزید تحقیقات پولیس سب انسپکٹر امول چنڈھے کر رہے ہیں۔

ہندوستھان سماچار

--------------------

ہندوستان سماچار / جاوید این اے