وزیراعلیٰ ڈاکٹر یادو نے برہانپور کے کسانوں کے کھاتوں میں 107 کروڑ 82 لاکھ روپے منتقل کیے - بلرام کرشی مہوتسو سے اجین سے ورچوئلی خطاب

بھوپال، 30 جولائی (ہ س)۔ مدھیہ پردیش کے وزیراعلیٰ ڈاکٹر موہن یادو نے کہا کہ کسانوں کی فلاح و بہبود کا جو عزم ریاستی حکومت نے لیا ہے، اس کی تکمیل کے لیے ہم مسلسل متحرک ہیں۔ کسانوں کے ہر مسئلے کا حل نکالنا ہماری اولین ترجیح ہے۔ انہوں نے کہا کہ برہانپور میں مئی اور جون میں موسم کی مار نے کیلے کی فصل کو شدید نقصان پہنچایا۔ برہانپور شہر، برہانپور دیہی، نیپانگرا اور کھکنار تحصیلوں کے 188 گاوں کے 8 ہزار 115 کسانوں کی کیلے کی فصل متاثر ہوئی ہے۔ بحران کی اس گھڑی میں ریاستی حکومت کسانوں کے ساتھ کھڑی ہے۔

وزیراعلیٰ ڈاکٹر یادو جمعرات کو برہانپور میں منعقدہ بلرام کرشی مہوتسو سے اجین سے ورچوئلی خطاب کر رہے تھے۔ وزیراعلیٰ ڈاکٹر یادو نے کیلے کی پیداوار میں ہوئے نقصان کے ازالے کے لیے کسانوں کے کھاتوں میں سنگل کلک کے ذریعے معاوضے کی رقم منتقل کی۔ برہانپور میں منعقدہ پروگرام میں انچارج وزیر تلسی رام سلاوٹ، رکن پارلیمنٹ گنیشور پٹیل، سابق وزیر و رکنِ اسمبلی محترمہ ارچنا چٹنس موجود تھیں۔ وی سی (ویڈیو کانفرنسنگ) کے ذریعے برہانپور سے شامل محترمہ چٹنس نے کہا کہ وزیراعلیٰ ڈاکٹر یادو کو رکشا بندھن پر برہانپور سے کیلے کے ریشے سے بنی راکھی بھیجی جائے گی۔

وزیراعلیٰ ڈاکٹر یادو نے کہا کہ آج قدرتی آفت سے متاثرہ برہانپور ضلع کے 8 ہزار سے زائد کسانوں کے کھاتوں میں 107 کروڑ 72 لاکھ روپے سے زیادہ کی راحتی رقم سنگل کلک سے منتقل کی جا رہی ہے۔ یہ رقم مشکل وقت میں کسانوں کو سہارا دے گی۔ جب تک کسانوں کے چہروں پر دوبارہ مسکراہٹ نہیں آ جاتی، ریاستی حکومت چین سے بیٹھنے والی نہیں ہے۔

وزیراعلیٰ ڈاکٹر یادو نے ریاست کے عوام کو مقدس ساون کے مہینے کی مبارکباد اور نیک خواہشات پیش کیں۔ وزیراعلیٰ ڈاکٹر یادو نے کلکٹرز کو ہدایت دی کہ ساون کے مہینے میں ریاست میں جہاں جہاں سے کانوڑ یاترا نکلنے والی ہے، وہاں کانوڑیوں کے لیے تمام ضروری انتظامات پہلے سے یقینی بنائے جائیں۔ وزیراعلیٰ ڈاکٹر یادو نے کہا کہ وزیراعظم نریندر مودی کی رہنمائی میں 'کسان فلاح و بہبود سال 2026' میں ریاستی حکومت کسانوں کی خوشحالی، احترام اور فلاح کے لیے متعدد اہم کاموں کو تیزی سے پورا کر رہی ہے۔ انہوں نے اپیل کی کہ کسان نئی ٹیکنالوجی کو اپنائیں، قدرتی کھیتی، آرگینک کھیتی اور باغبانی کی فصلوں سے اپنی آمدنی بڑھائیں۔ کھیتی سے تمام اقسام کی صنعتوں کے لیے خام مال اور نوجوانوں کو روزگار کے مواقع ملتے ہیں۔ ریاستی حکومت نے کسان فلاح و بہبود سال کے ذریعے کسانوں کو فائدہ پہنچانے کے لیے 16 محکموں کے ساتھ مل کر ایکشن پلان تیار کیا ہے۔ کسانوں کی خوشحالی اور ان کی آمدنی دگنی کرنے کے لیے ضلع سطح پر بلرام کرشی مہوتسو منعقد کیے جا رہے ہیں۔ اس کی شروعات ماں اہلیہ بائی ہولکر کی سرزمین اندور سے کی گئی تھی۔

وزیراعلیٰ ڈاکٹر یادو نے کہا کہ تاپتی ندی کے کرم سے برہانپور کا علاقہ اپنی باغبانی کی فصلوں کے لیے مشہور ہے۔ یہاں کے ذائقہ دار کیلے، ہلدی اور کپاس اپنے آپ میں نہایت خاص ہیں۔ یہاں تمام مذاہب کے درمیان مل جل کر رہنے کی ثقافت، کھیتی کے تنوع میں بھی دکھائی دیتی ہے۔ یہاں زراعت سے لے کر کپڑا، دوا سے لے کر فرنیچر اور پائپ کے سامان سے لے کر دیگر متعدد چیزیں تیار کی جاتی ہیں۔ کپاس اور کپڑے کی پیداوار کو سہولت دینے کے مقصد سے ریاستی حکومت نے کپاس پر لگنے والے منڈی ٹیکس کو آدھا کر دیا ہے، اس سے ریاست بھر کے کپاس پیدا کرنے والے کسانوں کو فائدہ ملا۔ قابلِ ذکر ہے کہ اس کے لیے مانگ سب سے پہلے برہانپور ضلع سے ہی اٹھی تھی۔ برہانپور کو کیلے کی فصل کی پروسیسنگ کے لیے قومی سطح پر اعزاز ملا ہے۔ اب کیلے کے ریشے سے کپڑا اور آرائشی سامان بھی تیار کیا جا رہا ہے۔ ان مصنوعات کی ای-کامرس پلیٹ فارم کے ذریعے فروخت سے ملک و دنیا میں برہانپور کو نئی پہچان مل رہی ہے۔

وزیراعلیٰ ڈاکٹر یادو نے کہا کہ برہانپور کے کسانوں نے کھیتی میں فصلوں کے تنوع پر خصوصی توجہ دی ہے۔ کپاس کی فصل ہینڈلوم کے ساتھ ہی پاور لوم سے مربوط مزدوروں کو بااختیار بناتی ہے۔ کھنڈوہ اور برہانپور کی کپاس منڈی میں ٹیکس ایک روپیہ سے گھٹا کر آدھا کرنے کی ہدایات دی گئی ہیں۔ برہانپور کے کسانوں کو دھار کے پی ایم مترا پارک کا بھی فائدہ ملے گا۔ برہانپور اب صرف خام مال ہی نہیں، بلکہ پروسیسنگ، ویلیو ایڈیشن اور ایکسپورٹ کا بھی بڑا ہب بننے کی سمت قدم بڑھا رہا ہے۔ ضلع میں آبپاشی کے لیے مختلف پروجیکٹس پر کام ہو رہا ہے۔ برہانپور میں آبپاشی کا رقبہ بڑھا ہے، ہر کھیت تک پانی پہنچانا ہمارا عزم ہے۔

وزیراعلیٰ ڈاکٹر یادو نے کہا کہ ریاستی حکومت مہاراشٹر کے ساتھ مل کر تاپتی میگا ریچارج پروجیکٹ پر کام کر رہی ہے۔ ریاستی حکومت سرمایہ کاری کو فروغ دینے کے لیے بھی کام کر رہی ہے۔ انہوں نے بتایا کہ گوالیار کو ٹیلی کام سیکٹر کے مینوفیکچرنگ زون کے طور پر قائم کرنے کے لیے آج نئی دہلی میں حکومتِ ہند اور مدھیہ پردیش حکومت کے درمیان ایم او یو پر دستخط کیے جائیں گے۔ ریاستی حکومت نوجوانوں کو روزگار دلانے اور کسانوں کو فصل کی صحیح قیمت دلانے کے لیے پرعزم ہے۔ برہانپور میں منعقدہ پروگرام میں میئر محترمہ مادھوری اتل پٹیل، ضلع صدر منوج مانے، ضلع پنچایت صدر برہانپور محترمہ سونالی پردیپ پٹیل سمیت متعدد عوامی نمائندے، بڑی تعداد میں کسان بھائی بہن اور مقامی شہری موجود تھے۔

ہندوستھان سماچار

---------------

ہندوستان سماچار / انظر حسن