ریاستی کانگریس دفتر کے باہر پتلا نذر آتش کرکے احتجاج درج کرایا

بھوپال، 30 جولائی (ہ س)۔ بھوپال ضلع خواتین کانگریس نے جمعرات کے روز ریاستی کانگریس دفتر کے احاطے میں احتجاجی مظاہرہ کرتے ہوئے پتلا نذر آتش کیا۔ یہ پروگرام آل انڈیا خواتین کانگریس کی قومی صدر الکا لامبا کی ہدایت نیز مدھیہ پردیش خواتین کانگریس کی ریاستی صدر رینا بورا سی کی رہنمائی میں منعقد کیا گیا۔

خواتین کانگریس نے مرکزی وزیر پرہلاد جوشی کی جانب سے بلقیس بانو کیس کے مجرموں کی مبینہ حمایت اور استقبال کو لے کر احتجاج درج کرایا۔ ساتھ ہی، رکن پارلیمنٹ کنگنا رناوت کے احتجاج کرنے والی خواتین کے تعلق سے مبینہ تبصروں پر بھی اعتراض ظاہر کیا۔ مظاہرے کے دوران خواتین کانگریس کی عہدیداروں نے کہا کہ خواتین کے احترام، سلامتی اور انصاف کے مسائل پر حساسیت ضروری ہے نیز خواتین کے خلاف جرائم اور توہین آمیز تبصروں کے خلاف سخت موقف اختیار کیا جانا چاہیے۔ تنظیم نے کہا کہ وہ ایسے معاملات میں اپنی آواز اٹھاتی رہے گی اور خواتین کے احترام نیز انصاف کو یقینی بنانے کا مطالبہ کرتی رہے گی۔

پروگرام میں ضلع خواتین کانگریس کی جنرل سکریٹری مہک رانا، جنرل سکریٹری روپالی شرما، سکریٹری لتا دیورے، بلاک صدر رتنا پانڈے، جوائنٹ سکریٹری شوبھا چاندے، بلاک صدر مایا وشوکرما، شوبھا گجرے، سنتوشی چورسیہ، روبی خان سمیت بڑی تعداد میں خواتین کانگریس کی کارکنان موجود رہیں۔

ہندوستھان سماچار

---------------

ہندوستان سماچار / انظر حسن