گوہاٹی، 26 جولائی (ہ س)۔ آسام میں سیلاب کا پانی اب آہستہ آہستہ کم ہونا شروع ہو گیا ہے۔ اس کے باوجود بالائی آسام میں صورتحال اب بھی بہت سنگین ہے۔ آسام اسٹیٹ ڈیزاسٹر مینجمنٹ اتھارٹی کے 25 جولائی کو جاری کردہ اعداد و شمار کے مطابق ریاست میں مزید چار اموات کی تصدیق ہوئی ہے۔ اس سے ریاست میں اب تک مرنے والوں کی کل تعداد 66 ہو گئی ہے۔ آسام میں خطرے کے نشان سے اوپر بہنے والے دریاؤں میں دکھھو (شیوساگر) اور دھنسیری (نمالی گڑھ) شامل ہیں۔

سنیچر کی رات ہونے والی آسام کابینہ کی میٹنگ میں سیلاب سے نمٹنے کے لیے امدادی کاموں اور نقصانات کا جائزہ لینے میں تیزی لانے کا فیصلہ کیا گیا۔ وزیر اعلی ڈاکٹر ہیمنت بسوا شرما کی ہدایت پر تمام اقدامات جنگی پیمانے پر کیے جا رہے ہیں۔ اس کے ساتھ ہی ریاستی وزرا اور ایم ایل اے متاثرہ علاقوں کا دورہ کرکے امدادی کاموں کی مسلسل نگرانی کر رہے ہیں۔

اس وقت کل 10 اضلاع سیلاب سے متاثر ہیں۔ یہ اضلاع گولہ گھاٹ، چرایڈیو، کامروپ، ہوجای، ڈبرو گڑھ، شیوساگر، جورہاٹ، سونیت پور، کامروپ (میٹرو) اور ناگاؤں ہیں۔ 10 اضلاع کے 28 ریونیو حلقوں کے کل 810 گاؤں سیلاب سے متاثر ہیں۔ ریاست کی کل 6,54,838 آبادی اور 34,970.8 ہیکٹر زرعی زمین زیر آب ہے۔ ریاستی حکومت نے سیلاب سے متاثرہ لوگوں کے لیے 90 امدادی کیمپوں اور 184 امدادی تقسیم مراکز سمیت کل 274 کیمپ قائم کیے ہیں۔ لوگ امدادی کیمپوں میں پناہ لے رہے ہیں۔ جبکہ 18,902 غیر کیمپ کے رہائشیوں کو امدادی تقسیم کے مراکز پر راحت مل رہی ہے۔

سیلاب کے پانی سے برآمد ہونے والی لاشوں کی تعداد 25 جولائی کو چار ریکارڈ کی گئی تھی، جن میں سے ایک لاش چرایڈیو میں اور تین شیوساگر میں برآمد ہوئی تھیں۔ سیلاب سے متاثرہ جانوروں کی کل تعداد 4,54,071 ریکارڈ کی گئی ہے، جس میں بڑے 93,751، چھوٹے 57,897 اور پولٹری 3,02,423 شامل ہیں۔ دریں اثنا، کل 3,021 جانور سیلاب کے پانی میں بہہ گئے۔ ان میں چرائیڈیو ضلع میں 3,016 اور جورہاٹ ضلع میں پانچ جانور شامل ہیں۔

ایس ڈی آر ایف، ڈی ڈی آر ایف، این ڈی آر ایف، پولیس، فائر اینڈ ایمرجنسی سروسز (ایف اینڈ ای ایس)، سرکل آفس/لوکل ایڈمنسٹریشن، سول ڈیفنس/ٹرینڈ رضاکار اور فائر ڈپارٹمنٹ سیلاب سے متعلق امدادی اور بچاؤ کی کارروائیوں میں شامل ہیں۔ دریں اثنا، ریاستی حکومت کی طرف سے سیلاب سے متاثرہ علاقوں میں کل 210 طبی ٹیمیں تعینات کی گئیں۔ اس دوران 55 کشتیاں بھی امدادی کاموں میں مصروف تھیں۔ سیلاب کے پانی میں پھنسے 13 افراد کو کشتیوں کے ذریعے بچا لیا گیا۔ جبکہ کشتیوں سے 22 جانوروں کو بھی بچایا گیا۔

سیلاب نے سڑکوں، پلوں اور دیگر بنیادی ڈھانچے کو بڑے پیمانے پر نقصان پہنچایا ہے۔ حکومت اس سلسلے میں باقاعدگی سے جائزہ اجلاس منعقد کر رہی ہے۔ سیلاب سے متاثرہ جورہاٹ ضلع میں، مرکزی وزیر مملکت پویترا مارگریٹا نے صورتحال کا جائزہ لینے کے لیے ممبران پارلیمنٹ اور ایم ایل اے اور ضلعی سطح کے عہدیداروں کے ساتھ ایک جائزہ میٹنگ کی۔

ہندوستھان سماچار

--------

ہندوستان سماچار / عبدالواحد