ہرادون، 18 جولائی (ہ س): اتراکھنڈ کے رودرپریاگ میں رشی کیش-بدری ناتھ قومی شاہراہ اور کیدار ناتھ قومی شاہراہ کو جوڑنے کے لیے تعمیر کی جا رہی 900 میٹر طویل سرنگ کی تعمیر مکمل ہو گئی ہے۔ اس کے ساتھ تعمیر کیا جا رہا 200 میٹر طویل پل بھی اپنے آخری مرحلے میں پہنچ چکا ہے۔

اس منصوبے کی تکمیل سے بدری ناتھ اور کیدار ناتھ دھام آنے جانے والے عقیدت مندوں کے ساتھ ساتھ مقامی لوگوں کو بھی بڑی راحت ملے گی۔

ضلع مجسٹریٹ وشال مشرا نے بتایا کہ پل کی تعمیر کا کام 31 اگست تک مکمل کر لیا جائے گا۔ اس کے بعد پل کے معیار، حفاظت اور تکنیکی معیارات کی جانچ کے لیے ضروری ٹیسٹنگ اور ٹرائل کا عمل شروع کیا جائے گا۔

انہوں نے بتایا کہ اس وقت رودرپریاگ شہر سے گزرنے والی گاڑیوں کی وجہ سے اکثر ٹریفک کا دباؤ بڑھ جاتا ہے، جس کے باعث مقامی شہریوں اور مسافروں کو جام کی پریشانی کا سامنا کرنا پڑتا ہے۔ پل اور سرنگ کے استعمال میں آنے کے بعد گاڑیوں کی آمدورفت زیادہ منظم ہو جائے گی، سفر کا وقت کم ہوگا اور شہر میں ٹریفک کا دباؤ بھی کافی حد تک کم ہو جائے گا۔

ضلع مجسٹریٹ نے کہا کہ یہ منصوبہ صرف ٹریفک نظام کو بہتر بنانے تک محدود نہیں ہے بلکہ چار دھام یاترا کے مجموعی انتظامات کو مضبوط بنانے کی سمت میں بھی ایک اہم قدم ہے۔ اس سے بدری ناتھ اور کیدار ناتھ دھام آنے والے لاکھوں عقیدت مندوں کو محفوظ، تیز رفتار اور آمدورفت کی بہتر سہولت حاصل ہوگی۔

ہندوستھان سماچار

---------------

ہندوستان سماچار / عبدالواحد