نئی دہلی، 18 جولائی (ہ س)۔ ویسٹ انڈیز کے سابق کپتان برائن لارا نے عظیم کرکٹر سر گارفیلڈ سوبرز کے انتقال پر گہرے رنج و غم کا اظہار کرتے ہوئے انہیں ویسٹ انڈیز کا اب تک کا ’بہترین کھلاڑی‘ قرار دیا ہے۔ لارا نے کہا کہ سوبرز کی میراث کو کبھی فراموش نہیں کیا جا سکے گا۔

انسٹاگرام پر شیئر کیے گئے اپنے پیغام میں لارا نے لکھا،”ہمارے سب سے عظیم کھلاڑی ہمیں چھوڑ کر چلے گئے، ان کے خاندان کے ہر فرد کے ساتھ میری گہری تعزیت ہے جنہوں نے ہر مشکل وقت میں ان کا ساتھ دیا اور انہیں وہ طاقت دی جس کی انہیں سب سے زیادہ ضرورت تھی۔ میری دعا ہے کہ ان کے خاندان کو اس انتہائی مشکل وقت میں سکون اور طاقت ملے۔ سکون سے آرام کریں، عظیم کھلاڑی۔ آپ کی میراث کو کبھی فراموش نہیں کیا جائے گا۔“

سوبرز کرکٹ کی تاریخ کے عظیم آل راو¿نڈرز میں سے ایک تھے

سر گارفیلڈ سوبرز نے 1954 سے 1974 کے درمیان ویسٹ انڈیز کے لیے 93 ٹیسٹ میچ کھیلے۔ اس عرصے کے دوران انھوں نے 57.78 کی اوسط سے 8,032 رن بنائے جس میں 26 سنچریاں شامل تھیں۔گیندبازی میں انہوں نے 235 وکٹیں بھی حاصل کیں۔

بائیں ہاتھ کے ایک شاندار بلے باز ہونے کے ساتھ ساتھ، سوبرز تیز گیند بازی، بائیں ہاتھ کے آرتھوڈوکس اسپن اور چائنا مین اسپن ، تینوں میں ماہر تھے۔ ان کی فیلڈنگ بھی غیر معمولی تھی، جس نے انہیں کرکٹ کی تاریخ کے سب سے مکمل کھلاڑیوں میں سے ایک بنا دیا۔

ان کے نام کئی تاریخی کارنامے ہیں

سوبرز نے 1958 میں پاکستان کے خلاف ناٹ آو¿ٹ 365 رن کی تاریخی اننگز کھیلی تھی۔ یہ اس وقت ٹیسٹ کرکٹ میں سب سے زیادہ انفرادی اسکور تھا اور یہ ریکارڈ 36 سال تک قائم رہا۔

اس کے بعد 1968 میں ناٹنگھم شائر کے لیے کاو¿نٹی کرکٹ کھیلتے ہوئے وہ گلیمورگن کے میلکم نیش کے ایک اوور میں لگاتار چھ چھکے لگا کر فرسٹ کلاس کرکٹ میں یہ کارنامہ انجام دینے والے دنیا کے پہلے بلے باز بن گئے۔

بہت سے بڑے اعزازات سے نوازا گیا

کرکٹ میں ان کی شاندار شراکت کے لیے، ملکہ الزبتھ دوم نے انہیں 1975 میں نائٹ ہڈ کا خطاب دیا۔ 2000 میں، انہیں وزڈن نے 20ویں صدی کے پانچ عظیم ترین کرکٹرز میں سے ایک قرار دیا۔

ان کی عظیم میراث آج بھی سر گارفیلڈ سوبرز ٹرافی کی شکل میں زندہ ہے، جسے انٹرنیشنل کرکٹ کونسل (آئی سی سی ) ہر سال تمام فارمیٹس میں بہترین مرد بین الاقوامی کرکٹر کو ایوارڈ دیتی ہے۔

سر گارفیلڈ سوبرز جمعہ کو انتقال کر گئے۔ ان کی موت سے کرکٹ کی تاریخ کے ایک سنہری باب کا خاتمہ ہو گیا ہے۔ کھیلوں کے بہت سے روشن ستارے انہیں خراج عقیدت پیش کر رہے ہیں اور ان کے تعاون کو یاد کر رہے ہیں۔

ہندوستھان سماچار

ہندوستان سماچار / محمد شہزاد