ناگپور، 18 جولائی (ہ س): شیو سینا یو بی ٹی کے سربراہ ادھو ٹھاکرے نے نیٹ امتحان کے مبینہ پیپر لیک معاملہ پر مرکزی حکومت کو شدید تنقید کا نشانہ بناتے ہوئے مرکزی وزیر تعلیم دھرمیندر پردھان کے استعفیٰ کا مطالبہ کیا ہے۔ ناگپور میں صحافیوں سے گفتگو کرتے ہوئے انہوں نے الزام عائد کیا کہ امتحانی نظام کی خامیوں کے باعث لاکھوں طلبہ کا مستقبل خطرے میں پڑ گیا ہے اور حکومت اس مسئلے سے نمٹنے میں ناکام رہی ہے۔

ادھو ٹھاکرے 18 جولائی کو ناگپور کے رام نگر میں واقع رام مندر میں منعقد ہونے والی رام رکشا پٹھن تحریک میں شرکت کے لیے ناگپور پہنچے تھے۔ ناگپور ہوائی اڈے پر میڈیا سے گفتگو کرتے ہوئے انہوں نے دہلی کے جنتر منتر پر نیٹ امتحان میں مبینہ بے ضابطگیوں کے خلاف بھوک ہڑتال کرنے والے سماجی کارکن سونم وانگچک کو پولیس کی جانب سے اسپتال منتقل کیے جانے کی کارروائی پر بھی سخت اعتراض ظاہر کیا۔

انہوں نے الزام لگایا کہ طلبہ اور سماجی کارکنوں کے جائز مطالبات پر بات چیت کرنے کے بجائے حکومت نے دباؤ اور سخت کارروائی کا راستہ اختیار کیا ہے، جو جمہوری اقدار کے منافی ہے۔ ادھو ٹھاکرے نے کہا کہ امتحانی نظام میں شفافیت اور اعتماد کی بحالی کے لیے فوری اصلاحات ناگزیر ہیں۔ انہوں نے مطالبہ کیا کہ امتحانی عمل کو مکمل طور پر شفاف اور قابل اعتماد بنانے کے لیے مرکزی حکومت فوری اقدامات کرے تاکہ طلبہ کے مستقبل کے ساتھ کسی قسم کا کھلواڑ نہ ہو۔

انہوں نے مزید کہا کہ حکومت کو طلبہ کے مسائل کے حوالے سے سنجیدہ اور حساس رویہ اختیار کرنا چاہیے۔ ان کے مطابق ملک بھر کے طلبہ میں بڑھتی ہوئی بے چینی اور ناراضگی کو نظر انداز کرنے کے بجائے حکومت کو جلد از جلد مناسب فیصلہ کرتے ہوئے ان کے خدشات دور کرنے چاہئیں۔

ہندوستھان سماچار

--------------------

ہندوستان سماچار / جاوید این اے