ریلوے تحریک کمیٹی کے وفد کی ضلع کلکٹر سے ملاقات، ریلوے منصوبوں میں تیزی لانے کا مطالبہبیڑ، 16 جولائی (ہ س)۔ ریلوے مطالبہ تحریک کمیٹی کے ایک وفد نے ضلع کلکٹر ویویک جانسن سے ملاقات کرکے بیڑ۔پرلی ریلوے لائن کا کام تیزی سے مکمل کرنے، بیڑ سے ممبئی کے درمیان براہ راست ریل سروس شروع کرنے اور حال ہی میں سروے کے لیے منظور شدہ یڈشی سے اورنگ آباد ریلوے لائن کے سروے کا عمل جلد مکمل کرانے کے لیے مؤثر پیروی کرنے کا مطالبہ کیا۔ کمیٹی کے صدر جواہر لال سارڈا نے ضلع کلکٹر کو بتایا کہ ان ریلوے منصوبوں کی بروقت تکمیل سے بیڑ ضلع سمیت پورے مراٹھواڑہ کی ترقی کو نئی رفتار ملے گی۔ انہوں نے کہا کہ برسوں سے زیر التوا ریلوے منصوبوں کو فوری طور پر مکمل کرنا وقت کی اہم ضرورت ہے تاکہ علاقے میں بہتر ریل رابطہ قائم ہو سکے۔اس موقع پر وفد میں کمیٹی کے صدر جواہر لال سارڈا، نائب صدر اشوک شیٹے، معاون سکریٹری روی اوبالے، خزانچی وشنوداس بیانی، سینئر رہنما ستیہ نارائن لاہوٹی، سریش میکھے، ڈاکٹر ارون بھسمے، شیواجی راؤ جادھو، راجو بمب، بھاؤ صاحب چندن شیو اور شانتی لال پٹیل سمیت دیگر عہدیداران موجود تھے۔ وفد نے ضلع کلکٹر کے دفتر میں مختلف ریلوے منصوبوں پر تفصیلی تبادلۂ خیال کیا اور کہا کہ مراٹھواڑہ کی مجموعی ترقی کے لیے ریلوے رابطے کا مضبوط ہونا بے حد ضروری ہے، اس لیے زیر التوا منصوبوں کو جلد از جلد مکمل کیا جانا چاہیے۔وفد نے اس یقین کا اظہار کیا کہ اہلیہ نگر۔بیڑ۔پرلی ریلوے لائن مکمل ہونے کے بعد بیڑ ضلع کے صنعتی، تعلیمی، زرعی، تجارتی اور خدمات کے شعبوں کو نمایاں فروغ ملے گا۔ اس کے علاوہ بیڑ سے ممبئی تک براہ راست ریل سروس شروع ہونے سے طلبہ، تاجروں، ملازمت پیشہ افراد، کاروباری حضرات اور دیگر مسافروں کو بڑی سہولت حاصل ہوگی۔ ضلع کلکٹر ویویک جانسن نے وفد کے مطالبات کو متعلقہ محکموں تک پہنچانے اور ضروری کارروائی کے لیے مثبت رویہ اختیار کرنے کا یقین دلایا۔ انہوں نے کہا کہ متعلقہ حکام کے ساتھ اس سلسلے میں مناسب سطح پر بات چیت کی جائے گی تاکہ ریلوے منصوبوں پر پیش رفت کو تیز کیا جا سکے اور عوام کی جائز توقعات پوری ہوں۔ہندوستھان سماچار--------------------

ہندوستان سماچار / جاوید این اے