کاٹھمنڈو، 14 جولائی (ہ س)۔

نیپال میں مسلسل ہورہی بارش کی وجہ سے آئے سیلاب اور لینڈ سلائیڈنگ نے کاٹھمنڈو جانے والے تمام چھوٹے سڑک کے راستوں کو بند کردیا ہے۔ مکوانپورضلع انتظامیہ کے دفتر نے ہیٹونڈا سے ہو کر کاٹھمنڈو جانے والی کانتی لوک پتھ شاہراہ کو اگلی اطلاع تک بند کر دیا ہے۔ اس شاہراہ کے کئی مقامات پر لینڈ سلائیڈنگ کی وجہ سے راستہ بلاک ہو گیا ہے۔

اسی طرح کاٹھمنڈو تک پہنچنے والے ہیٹونڈا-بھینسے-بھیم فیدی سڑک کے حصے پر کئی مقامات پر لینڈ سلائیڈنگ ہونے سے تمام گاڑیوں کو ہیٹونڈا بازار کے علاقے میں ہی روک دیا گیا ہے۔ مکوانپور ضلع پولیس دفتر کے مطابق، بھینسے-پالونگ-نوبیسے سے ہوتے ہوئے کاٹھمنڈو تک آنے والی سڑک پر بھی گاڑیوں کی آمد و رفت روک دی گئی ہے۔ بھینسے سے سم بھنجیانگ تک مختلف مقامات پر لینڈ سلائیڈنگ کے خطرے کو دیکھتے ہوئے یہ فیصلہ کیا گیا ہے۔

ہیٹونڈا-کولیکھانی-پھاکھیل-کاٹھمنڈو راستے پر واقع سکورا کی لینڈ سلائیڈنگ رات میں ہی صاف کر دی گئی تھی، لیکن مسلسل خطرہ بنے رہنے کی وجہ سے فی الحال اس راستے پر بھی ٹریفک پر پابندی لگا دی گئی ہے۔ وہیں، ہیٹونڈا-سسنیری-کاٹھمنڈو سڑک پر اندرسروور گاوں پالیکا-3 کے سسنیری علاقے میں آئے سیلاب سے ٹریفک متاثر ہو گیا۔ اس کے نتیجے میں وہاں پہنچنے والی گاڑیوں کو پوری رات روکے رکھا گیا۔ مکوانپور پولیس کے ترجمان اور ڈی ایس پی مادھو کافلے نے بتایا کہ منگل کی صبح سے بیچ راستے میں پھنسی چھوٹی گاڑیوں کو سسنیری سے دھیرے دھیرے آگے بھیجنا شروع کر دیا گیا ہے۔

پولیس کے مطابق، فی الحال ہیٹونڈا اور کاٹھمنڈو کے درمیان صرف سندھولی اور نارائن گڑھ سے ہو کر جانے والے راستوں سے ہی سفر کی اجازت دی گئی ہے۔ ان کے علاوہ تمام دیگر سڑک کے راستوں پر ٹریفک پوری طرح روک دیا گیا ہے۔ حالانکہ نارائن گڑھ-موگلنگ سڑک کے حصے پر بھی لینڈ سلائیڈنگ کا خطرہ بنا ہوا ہے، پھر بھی ہیٹونڈا سے ہو کر اس راستے سے جانے والی گاڑیوں کو فی الحال نہیں روکا گیا ہے۔

ہندوستھان سماچار

ہندوستان سماچار / انظر حسن