جموں میں ایم بی بی ایس کی 50 اضافی نشستوں کو منظوری ملی

جموں،13 جولائی (ہ س)۔

جموں و کشمیر میں طبی تعلیم کے شعبے کے لیے ایک بڑی خوشخبری سامنے آئی ہے۔ نیشنل میڈیکل کمیشن (این ایم سی) نے گورنمنٹ میڈیکل کالج (جی ایم سی) جموں میں ایم بی بی ایس کی 50 اضافی نشستوں کی منظوری دے دی ہے، جس کے بعد تعلیمی سال 2026-27 سے کالج میں سالانہ داخلوں کی مجموعی تعداد 200 سے بڑھ کر 250 ہو جائے گی۔

نیشنل میڈیکل کمیشن کے میڈیکل اسیسمنٹ اینڈ ریٹنگ بورڈ (ایم اے آر بی) کی جانب سے جاری کردہ اجازت نامے میں کہا گیا ہے کہ یہ منظوری جموں یونیورسٹی سے وابستہ گورنمنٹ میڈیکل کالج جموں کی جانب سے پیش کی گئی درخواست کا تفصیلی جائزہ لینے کے بعد دی گئی ہے۔

اجازت نامے کے مطابق، کالج کی درخواست پر نیشنل میڈیکل کمیشن ایکٹ 2019 اور انڈر گریجویٹ میڈیکل ایجوکیشن اسٹینڈرڈز ضوابط 2023 کے تحت غور کیا گیا، جس کے بعد 50 نئی ایم بی بی ایس نشستوں کے اضافے کی منظوری دی گئی۔

اس فیصلے سے جموں و کشمیر کے طلبہ کو طبی تعلیم کے مزید مواقع میسر آئیں گے اور خطے میں معیاری طبی افرادی قوت کی تیاری کو بھی فروغ ملے گا۔

ہندوستھان سماچار

ہندوستان سماچار / محمد اصغر