یروشلم، 10 جولائی (ہ س)۔

دنیا بھر میں فضائی دفاعی نظام کی مانگ بڑھ رہی ہے۔ اسی تناظر میں اسرائیل کی معروف ہتھیار ساز کمپنی، رافیل ایڈوانسڈ ڈیفنس سسٹم، ہندوستانی دفاعی کمپنیوں کے ساتھ ہندوستان میں آئرن ڈوم انٹرسیپٹر میزائلوں کی تیاری کے امکانات کے بارے میں بات چیت کر رہی ہے۔ کمپنی ہندوستان میں ایک نئی پروڈکشن لائن قائم کرنے پر غور کر رہی ہے۔

دی یروشلم پوسٹ اور دیگر میڈیا رپورٹس کے مطابق، رافیل اس وقت شمالی اسرائیل میں اپنے پلانٹ میں آئرن ڈوم انٹرسیپٹر بناتا ہے۔ اس کے علاوہ کمپنی نے امریکی دفاعی کمپنی ریتھیان کے ساتھ شراکت میں گزشتہ سال امریکہ میں میزائل پروڈکشن لائن بھی شروع کی، جو امریکی میرین کور کو انٹرسیپٹر میزائل فراہم کرتی ہے۔

رپورٹس کے مطابق، ہندوستان میں پیداوار شروع کرنے سے رافیل کو عالمی منڈی میں برآمدات بڑھانے، پیداواری لاگت کو کم کرنے اور ضرورت پڑنے پر دیگر پیداواری مراکز کو بیک اپ فراہم کرنے میں مدد ملے گی۔ یہ بھارتی حکومت کی میک ان انڈیا پالیسی کے مطابق بھی ہو گا، جو غیر ملکی دفاعی کمپنیوں کو مقامی طور پر تیاری اور برآمدات کو فروغ دینے کی ترغیب دیتی ہے۔

ہندوستان نے پہلے ہی اسرائیل ایرو اسپیس انڈسٹریز (آئی اے آئی ) کے تعاون سے تیار کردہ بارک-8 فضائی دفاعی نظام کو اپنی فوج، بحریہ اور فضائیہ میں شامل کر لیا ہے۔ تاہم، ہندوستان مختصر فاصلے کے فضائی دفاع کے لیے دیسی نظام بھی تیزی سے تیار کر رہا ہے۔

ہندوستان میں پیداوار سے رافیل کو دوسرے ممالک کو فروخت کرنے، لاگت کو کم کرنے، ضرورت پڑنے پر دیگر پروڈکشن لائنوں کو اضافی بیک اپ فراہم کرنے اور ہندوستانی انتظامیہ کے ساتھ کمپنی کی پوزیشن کو مضبوط کرنے میں مدد کی توقع ہے۔ ہندوستانی انتظامیہ غیر ملکی دفاعی کمپنیوں سے مطالبہ کرتی ہے کہ وہ نہ صرف ہندوستان میں تیار کریں بلکہ وہاں سے برآمد بھی کریں تاکہ وہ اپنی مصنوعات مقامی فوج کو فروخت کر سکیں، اس طرح اس کی معیشت مضبوط ہو گی۔

ہندوستھان سماچار

ہندوستان سماچار / عطاءاللہ