راجوری کے گمبھیر مغلاں علاقے میں جاری آپریشن چالیس ویں روز میں داخل

جموں، یکم جولائی (ہ س)۔ راجوری ضلع کے منجاکوٹ سیکٹر کے گمبھیر مغلاں علاقے کے دوریمیل کے گھنے جنگلات میں جاری سیکورٹی فورسز کا آپریشن شیروالی بدھ کے روز 40ویں دن میں داخل ہوگیا۔ فورسز دہشت گردوں کی تلاش کے لیے مسلسل سرچ اور کومبنگ آپریشن چلا رہی ہیں۔سرکاری ذرائع کے مطابق خفیہ اطلاعات کی بنیاد پر شروع کیے گئے اس آپریشن میں فوج، پولیس اور دیگر سیکورٹی ایجنسیاں مشترکہ طور پر حصہ لے رہی ہیں۔ جدید نگرانی کے آلات اور زمینی کارروائیوں کی مدد سے پورے جنگلاتی علاقے کی باریک بینی سے تلاشی لی جا رہی ہے۔

حکام کا کہنا ہے کہ اگرچہ گزشتہ چند دنوں کے دوران دہشت گردوں کے ساتھ کوئی نیا آمنا سامنا نہیں ہوا، تاہم فورسز نے پورے علاقے کا سخت محاصرہ کر رکھا ہے تاکہ جنگل میں چھپے دہشت گرد فرار نہ ہو سکیں۔واضح رہے کہ راجوری کے بالائی علاقوں میں دہشت گردوں کی موجودگی سے متعلق خفیہ اطلاعات موصول ہونے کے بعد شروع کیا گیا یہ آپریشن حالیہ عرصے میں خطے کے طویل ترین انسدادِ دہشت گردی آپریشنز میں شمار کیا جا رہا ہے، جبکہ سیکورٹی فورسز نے واضح کیا ہے کہ دہشت گردوں کے خاتمے تک کارروائی جاری رہے گی۔

ہندوستھان سماچار

---------------

ہندوستان سماچار / محمد اصغر