جموں, 01 جولائی (ہ س)۔ سالانہ امرناتھ یاترا کے لیے آف لائن رجسٹریشن کا عمل بدھ کے روز جموں میں شروع ہوگیا۔ یاترا کے آغاز سے ایک روز قبل مختلف رجسٹریشن مراکز پر سینکڑوں عقیدت مند صبح سویرے ہی پہنچ گئے اور اپنی رجسٹریشن کرانے کے لیے قطاروں میں کھڑے نظر آئے۔رواں برس 57 روزہ شری امرناتھ یاترا 3 جولائی سے شروع ہوگی، جو اننت ناگ کے روایتی 48 کلومیٹر طویل ننون-پہلگام راستے اور گاندربل کے 14 کلومیٹر طویل بالتل راستے سے جاری رہے گی۔ لیفٹیننٹ گورنر منوج سنہا جمعرات کی صبح بھگوتی نگر یاتری نواس بیس کیمپ سے یاتریوں کے پہلے قافلے کو روانہ کریں گے۔

حکام کے مطابق اب تک تقریباً چار لاکھ عقیدت مند آن لائن رجسٹریشن کرا چکے ہیں، جبکہ بدھ کے روز ٹوکن رکھنے والے یاتریوں کی موقع پر رجسٹریشن بھی شروع کردی گئی۔ ملک کے مختلف حصوں سے جموں پہنچنے والے عقیدت مندوں کے لیے توی دریا کے کنارے، گیتا بھون، رام مندر اور بھگوتی نگر میں رجسٹریشن اور ٹوکن تقسیم کے خصوصی مراکز قائم کیے گئے ہیں۔

رات بھر ہونے والی بارش کے باوجود عقیدت مندوں کے جذبے میں کوئی کمی نہیں آئی اور رجسٹریشن مراکز پر ہر ہر مہادیو اور بم بم بھولے کے نعروں کی گونج سنائی دیتی رہی۔

ادھر ڈویژنل کمشنر رمیش کمار، ڈپٹی کمشنر راکیش منہاس اور ایس ایس پی جوگیندر سنگھ نے رجسٹریشن مراکز کا دورہ کرکے انتظامات کا جائزہ لیا اور متعلقہ حکام کو ہدایت دی کہ یاتریوں کو ہر ممکن سہولت فراہم کی جائے۔

محکمہ موسمیات کے مطابق گزشتہ 24 گھنٹوں کے دوران جموں میں 35.8 ملی میٹر بارش ریکارڈ کی گئی، جس کے باعث موسم خوشگوار ہوگیا اور کم از کم درجہ حرارت 23.3 ڈگری سیلسیس ریکارڈ کیا گیا۔

ہندوستھان سماچار

---------------

ہندوستان سماچار / محمد اصغر