ڈوڈہ کے بھلیسہ علاقے میں بادل پھٹنے سے سیلابی صورتحال

جموں، یکم جولائی (ہ س)۔ ضلع ڈوڈہ کے بھلیسہ علاقے میں بدھ کے روز شدید بارش کے دوران دو مختلف مقامات پر بادل پھٹنے سے اچانک سیلابی صورتحال پیدا ہو گئی، جس کے نتیجے میں کئی رابطہ سڑکیں بند ہو گئیں اور متعدد دیہات کا زمینی رابطہ منقطع ہوگیا۔اطلاعات کے مطابق بھلیسہ کے کلال گیسر علاقے میں بادل پھٹنے کے بعد آنے والے شدید سیلابی ریلے اپنے ساتھ بھاری مقدار میں ملبہ لے آئے، جس سے سڑکیں بند ہو گئیں اور آمد و رفت مکمل طور پر متاثر ہوئی۔

انتظامیہ کے مطابق مسلسل بارش کے باعث علاقے میں مزید لینڈ سلائیڈنگ اور سڑکوں کی بندش کا خدشہ برقرار ہے، جس کے پیش نظر صورتحال پر مسلسل نظر رکھی جا رہی ہے۔ حکام کا کہنا ہے کہ موسم بہتر ہوتے ہی ملبہ ہٹانے اور سڑکوں کی بحالی کا کام شروع کیا جائے گا۔ضلع انتظامیہ نے عوام سے اپیل کی ہے کہ وہ خراب موسم کے دوران غیر ضروری سفر سے گریز کریں، ندی نالوں اور لینڈ سلائیڈنگ والے علاقوں سے دور رہیں اور صرف سرکاری ہدایات پر عمل کریں تاکہ کسی بھی ناخوشگوار واقعے سے بچا جا سکے۔

ہندوستھان سماچار

---------------

ہندوستان سماچار / محمد اصغر