کولکاتا، 5 جون (ہ س)۔ کلکتہ ہائی کورٹ نے مغربی بنگال سی آئی ڈی سمن کیس میں ترنمول کانگریس کے قومی جنرل سکریٹری اور لوک سبھا رکن پارلیمنٹ ابھیشیک بنرجی کو ایک بڑا جھٹکا دیا ہے۔ عدالت نے جلد سماعت کے لیے ان کی درخواست خارج کر دی۔

یہ معاملہ اسمبلی میں ایم ایل ایز کے دستخطوں میں مبینہ بے ضابطگیوں سے متعلق ہے، جس میں چار اہم عہدوں کے لیے نامزدگی کے عمل کے دوران کچھ ایم ایل ایز کے دستخطوں میں تضادات کا الزام لگایا گیا تھا۔ اسمبلی سیکرٹریٹ نے اس معاملے کی جانچ سی آئی ڈی کو سونپی تھی۔

ابھیشیک بنرجی نے 3 جون کو کلکتہ ہائی کورٹ میں ایک عرضی دائر کی تھی، جس میں سی آئی ڈی کے سمن کو چیلنج کیا گیا تھا اور کسی بھی زبردستی کارروائی یا گرفتاری سے تحفظ کی درخواست کی گئی تھی۔ انہوں نے معاملہ کی جلد سماعت کی درخواست بھی کی۔

جمعہ کو، یہ معاملہ جسٹس چیتالی چٹوپادھیائے کی واحد جج کی تعطیلاتی بنچ کے سامنے سماعت کے لیے آیا، جہاں عدالت نے فاسٹ ٹریک سماعت کی مانگ کو مسترد کر دیا۔

سی آئی ڈی نے ابھیشیک بنرجی کو 1 جون کو پوچھ گچھ کے لیے طلب کیا تھا۔ تاہم، انہوں نے صحت کی وجوہات کا حوالہ دیتے ہوئے پیش ہونے کے لیے اضافی وقت کی درخواست کی۔ جس کے بعد سی آئی ڈی نے انہیں 8 جون کو پیش ہونے کے لیے نیا سمن جاری کیا۔

اطلاعات کے مطابق، ابھیشیک بنرجی اور مغربی بنگال کی سابق وزیر اعلیٰ ممتا بنرجی دونوں 8 جون کو نئی دہلی میں اپوزیشن اتحاد انڈیا بلاک کی میٹنگ میں شرکت کے لیے موجودہوں گے، جس نے اس معاملے کو لے کر سیاسی ہنگامہ آرائی کو مزید تیز کر دیا ہے۔

دریں اثناء اپوزیشن لیڈر اور دیگر عہدوں کے حوالے سے اسمبلی کو بھیجی گئی تجویز میں دستخطوں میں مبینہ تضادات سامنے آنے کے بعد معاملہ مزید بڑھ گیا۔ اسمبلی سیکرٹریٹ نے تحقیقات سی آئی ڈی کو سونپ دی جس کی بنیاد پر سمن جاری کیا گیا۔

فی الحال، عدالت نے واضح کیا ہے کہ معاملہ کی سماعت معمول کے طریقہ کار کے مطابق آگے بڑھے گی۔

---------------

ہندوستان سماچار / عبدالسلام صدیقی