اگرتلہ، 5 جون (ہ س)۔ مرکزی وزیر داخلہ امت شاہ کا تریپورہ میں مشہور تریپورہ سندری مندر (ماتاباڑی) کا مجوزہ دورہ جمعہ کو منسوخ کر دیا گیا۔ ان کا ہیلی کاپٹر کے ذریعے گمٹی ضلع کے ادے پور میں شکتی پیٹھ پہنچنے کا پروگرام تھا، لیکن ناموافق موسم کی وجہ سے یہ سفر ممکن نہیں ہو سکا۔

انتظامی ذرائع کے مطابق، امت شاہ جمعرات کی شام اگرتلہ پہنچے اور جمعہ کی صبح پوجا اور درشن کے لیے ماتاباڑی مندر جانے والے تھے۔ تاہم صبح سے خراب موسم اور حد نگاہ کم ہونے کے باعث ہیلی کاپٹر سروس کو غیر محفوظ تصور کیا گیا جس کے باعث دورہ منسوخ کرنے کا فیصلہ کیا گیا۔

گمٹی کے ضلع کلکٹر رنکو لاتھیر نے تصدیق کی کہ مرکزی وزیر داخلہ کا تریپورہ سندری مندر کا دورہ خراب موسم کی وجہ سے ملتوی کرنا پڑا۔ قابل ذکر ہے کہ تریپورہ سندری مندر ہندو عقیدت مندوں کے لئے ایک عظیم عقیدہ کا مرکز ہے اور یہ ملک کے 51 شکتی پیٹھوں میں سے ایک ہے۔ 22 ستمبر 2025 کو وزیر اعظم نریندر مودی نے از سر نو تعمیر کردہ مندر کمپلیکس کا افتتاح کیا۔ مرکزی وزارت سیاحت کی پرساد اسکیم کے تحت 54 کروڑ روپے سے زیادہ کی لاگت سے مندر اور آس پاس کے بنیادی ڈھانچے کو تیار کیا گیا ہے ۔

اپنے ماتاباڑی دورے کی منسوخی کے باوجود، امت شاہ کے تمام دیگر طے شدہ پروگرام شیڈول کے مطابق جاری رہیں گے۔ وہ اگرتلہ میں مجوزہ پشپ بنت پیلس ہوٹل پروجیکٹ کا سنگ بنیاد رکھیں گے۔ ریاستی حکومت اس پروجیکٹ کو سیاحت کے شعبے کو وسعت دینے کی طرف ایک اہم پہل سمجھتی ہے۔

مرکزی وزیر داخلہ مغربی تریپورہ ضلع میں ہندوستان-بنگلہ دیش سرحد پر لنکامورا سرحدی چوکی کا بھی دورہ کریں گے تاکہ سرحدی سیکورٹی، انسداد دراندازی، اسمگلنگ کنٹرول اور سرحدی علاقوں کی صورتحال کا جائزہ لیں۔

امیت شاہ اپنے دورے کے دوران شالباگن میں بی ایس ایف تریپورہ فرنٹیئر ہیڈ کوارٹر میں ایک اعلیٰ سطحی سیکورٹی جائزہ اجلاس کی صدارت بھی کریں گے۔ توقع ہے کہ میٹنگ میں ہندوستان-بنگلہ دیش سرحد پر نگرانی کو مضبوط بنانے، جدید ٹیکنالوجی کے استعمال، بارڈر مینجمنٹ اور سیکورٹی سے متعلق دیگر امور پر تفصیلی تبادلہ خیال کیا جائے گا۔

ہندوستھان سماچار

ہندوستان سماچار / محمد شہزاد