بم دھماکے کے معاملے میں سابق رکن اسمبلی شوکت ملا کے گھر این آئی اے کا چھاپہ

کولکاتا، 4 جون (ہ س)۔ جنوبی 24 پرگنہ ضلع کے بھانگر میں ہوئے بم دھماکے کے معاملے میں سابق ترنمول رکن اسمبلی شوکت ملا کی رہائش گاہ پر نیشنل انویسٹی گیشن ایجنسی (این آئی اے) کی ٹیم نے جمعرات کی صبح بڑی کارروائی کی۔ جانچ ایجنسی کی ٹیم بھاری پولیس فورس اور مرکزی فورس کے ساتھ ان کے جیون تلا میں واقع گھر پر پہنچی اور تلاشی مہم شروع کی۔

معلومات کے مطابق، تقریباً 10 گاڑیوں میں سوار ہو کر پہنچے افسران نے علاقے کو چاروں طرف سے گھیر لیا۔ اس دوران شوکت ملا اپنے گھر پر موجود نہیں تھے۔ ذرائع کے مطابق، وہ موقع سے غائب بتائے جا رہے ہیں۔ تلاشی مہم کے دوران ان کے بیٹے عمران ملا کو گھر لایا گیا اور جانچ ٹیم نے ان کے ساتھ گھر کے اندر داخل ہو کر تفصیلی پوچھ گچھ اور دستاویزات کی جانچ شروع کی۔ اس کے ساتھ ہی جانچ ایجنسی نے شوکت ملا کے دفتر کی بھی تلاشی لی۔

اس دوران شوکت ملا کی بیوی اور بیٹی بھی گھر پہنچ گئیں۔ افسران کی جانب سے گھر اور آس پاس کے علاقے کو گھیر کر گہرائی سے جانچ کی جا رہی ہے۔ معاملے سے منسلک ذرائع کے مطابق، جانچ ایجنسی دھماکے سے متعلق دستاویزات، ثبوتوں اور دیگر معلومات کی جانچ کر رہی ہے۔ ساتھ ہی اس وقت زخمیوں کو لے جانے والی گاڑیوں سے منسلک لوگوں کے گھروں پر بھی ٹیم پہنچی اور پوچھ گچھ کی۔

واضح رہے کہ بھانگر کے بامونیا علاقے میں ہوئے اس دھماکے میں ایک شخص کی موت ہو گئی تھی، جبکہ کئی لوگ زخمی ہوئے تھے۔ واقعے کے بعد علاقے میں کشیدگی پھیل گئی تھی اور کئی سیاسی الزامات اور جوابی الزامات سامنے آئے تھے۔ شوکت ملا سال 2016 اور 2021 میں کیننگ مشرق اسمبلی حلقے سے ٹی ایم سی کے رکن اسمبلی رہ چکے ہیں۔ حال ہی میں ریاستی حکومت نے ان کی سیکورٹی بھی واپس لے لی تھی۔

ہندوستھان سماچار

--------------

ہندوستان سماچار / انظر حسن