نئی دہلی، 4 جون (ہ س)۔ وزیر اعظم نریندر مودی کل (5 جون) گجرات اور دمن کا دورہ کریں گے۔ اس دورے کے دوران، وہ گجرات کے سورت میں تقریباً 18,800 کروڑ روپے اور دمن میں تقریباً 2,970 کروڑ روپے کے مختلف ترقیاتی پروجیکٹوں کا افتتاح کریں گے، سنگ بنیاد رکھیں گے اور انہیں وقف کریں گے۔ وزیر اعظم لکشدیپ میں 885 کروڑ روپے کے بندرگاہی پروجیکٹوں کا سنگ بنیاد بھی رکھیں گے۔

وزیر اعظم کے دفتر نے آج بتایاکہ وہ کل دوپہر 2:30 بجے ضلع سورت کے ہزیرہ پہنچیں گے اور وہاں جاری صنعتی سرگرمیوں اور بنیادی ڈھانچے کے پروجیکٹوں کا جائزہ لیں گے۔ اس کے بعد وہ سڑک، توانائی اور صنعتی شعبوں میں 18,800 کروڑ روپے سے زیادہ کے پروجیکٹوں کا افتتاح اور سنگ بنیاد رکھیں گے اور ایک عوامی اجلاس سے خطاب کریں گے۔

سورت میں، وزیر اعظم آٹھ لین والے وڈودرا-ممبئی ایکسیس کنٹرولڈ ایکسپریس وے کے پیکیج 6 اور 7 کو قوم کے نام وقف کریں گے۔ وہ قومی شاہراہ 56 کے ایک اہم حصے کی چار لین بنانے کے پروجیکٹ کا سنگ بنیاد بھی رکھیں گے۔ اس سے قبائلی علاقوں سے رابطہ مضبوط ہو گا اور مجسمہ اتحاد تک رسائی آسان ہو گی۔

اپنے دورے کے دوران وزیر اعظم سورت میں 200 بستروں پر مشتمل ای ایس آئی سی اسپتال کا بھی افتتاح کریں گے۔ اسپتال مختلف قسم کی خصوصی طبی خدمات، ایک مرکزی لیبارٹری اور 24 گھنٹے ایمرجنسی اور ٹراماکی دیکھ بھال فراہم کرے گا۔ وہ انٹر اسٹیٹ پاور ٹرانسمیشن سسٹم کے تحت گجرات کے ٹرانسمیشن نیٹ ورک کے توسیعی پروجیکٹ کا بھی افتتاح کریں گے۔ وہ ولساڈ میں پاور ڈسٹری بیوشن سسٹم کو اپ گریڈ کرنے، دہیج پیٹرولیم-کیمیکلز اور پیٹرو کیمیکلز انویسٹمنٹ ریجن اور سریگم انڈسٹریل ڈیولپمنٹ کارپوریشن میں فضلہ کو ٹھکانے لگانے اور ٹریٹمنٹ کے بنیادی ڈھانچے اور جمبوسر بلک ڈرگ پارک میں یوٹیلٹی پروجیکٹس کا بھی افتتاح کریں گے۔

اس کے بعد وہ ہوائی اڈے کی نئی ٹرمینل عمارت کا افتتاح کرنے اور شام 6:15 بجے کے قریب نمو اسپتال کو قوم کے نام وقف کرنے کے لیے دمن کا سفر کریں گے۔ اس کے بعد وہ تقریباً 2,970 کروڑ روپے کے مختلف ترقیاتی پروجیکٹوں کا افتتاح کریں گے، وقف کریں گے اور سنگ بنیاد رکھیں گے۔

دمن میں تقریباً 1,340 کروڑ روپے کے پروجیکٹ بشمول نامو ایئرپورٹ کی نئی ٹرمینل عمارت اور نمو اسپتال قوم کے نام وقف کیے جائیں گے ۔ نیا ٹرمینل علاقائی فضائی رابطہ کو مضبوط کرے گا، جبکہ اسپتال روزانہ تقریباً 1500 بیرونی مریضوں کی خدمت فراہم کر سکے گا۔

وزیر اعظم تقریباً 1,630 کروڑ روپے کے پروجیکٹوں کا سنگ بنیاد بھی رکھیں گے۔ ان میں آئیکونک برج، دامن کنونشن سینٹر اور نیشنل انسٹی ٹیوٹ آف فیشن ٹیکنالوجی (نفٹ) کیمپس شامل ہیں۔ توقع ہے کہ ان پروجیکٹوں سے سیاحت، سرمایہ کاری، روزگار اور بنیادی ڈھانچے کو فروغ ملے گا۔

وہ لکشدیپ کے لیے 885 کروڑ روپے کے چار اہم بندرگاہ پروجیکٹوں کا سنگ بنیاد بھی رکھیں گے۔ ان میں کلپینی اور کدمت جزائر کے مشرقی اور مغربی ساحلوں پر بندرگاہ کی سہولیات کی ترقی شامل ہے۔ ان کثیر مقاصد جیٹیوں کی تعمیر سے 300 میٹر لمبائی تک کروز اور مسافر بردار بحری جہازوں کا سال بھر آپریشن ہو سکے گا۔ یہ پروجیکٹمسافروں اور کارگو ہینڈلنگ، فش پروسیسنگ، ایندھن کی تقسیم، برف کی فراہمی اور کشتیوں کی مرمت کے لیے سہولیات بھی تیار کریں گے۔

ہندوستھان سماچار

ہندوستان سماچار / محمد شہزاد