نئی دہلی، 04 جون (ہ س)۔ وزیر خارجہ ڈاکٹر ایس جے شنکر نے آج یہاں وینزویلا کی کارگزار صدر ڈیلسی روڈریگز سے ملاقات کی۔ ڈاکٹر جے شنکر نے ایکس پر لکھا، مجھے آج یہاں (دہلی) وینزویلا کی کارگزار صدر ڈیلسی روڈریگزسے مل کر بہت خوشی ہوئی۔ میں ہندوستان-وینزویلا تعلقات کے لیے ان کی دیرینہ لگن کی بہت قدر کرتا ہوں۔ وزیر اعظم نریندر مودی کے ساتھ ان کی ملاقات ہمارے تعاون کو مزید مضبوط کرے گی۔

اس دورے کے دوران قائم مقام صدر روڈریگز وزیر اعظم مودی کے ساتھ دو طرفہ بات چیت کریں گی۔ یہ بات چیت ہندوستان-وینزویلا تعلقات کے تمام پہلووں کا احاطہ کرے گی اور توانائی کی حفاظت، تجارت اور سرمایہ کاری، دواسازی، صحت کی دیکھ بھال، نقل و حمل اور قابل تجدید توانائی جیسے شعبوں میں مزید تعاون کے راستے تلاش کرے گی۔

قابل ذکر ہے کہ وینزویلا کی کارگزار صدر ڈیلسی روڈریگز 3 سے 7 جون تک ہندوستان کا دورہ کر رہی ہیں۔ وہ آج وزیر اعظم نریندر مودی کے ساتھ دو طرفہ بات چیت کریں گی۔ ان مذاکرات کے دوران دونوں ممالک کے درمیان توانائی، تجارت، سرمایہ کاری، مینوفیکچرنگ، صحت اور نقل و حمل کے شعبوں میں تعاون بڑھانے پر بات چیت متوقع ہے۔ قائم مقام صدر کے ہمراہ ایک وفد بھی ہے جس میں امور خارجہ، اقتصادیات اور خزانہ، سائنس و ٹیکنالوجی، مواصلات اور اطلاعات اور ٹرانسپورٹ کے وزراء شامل ہیں۔ قائم مقام صدر روڈریگز اس سے قبل وزیر خارجہ اور نائب صدر کی حیثیت سے متعدد بار ہندوستان کا دورہ کر چکی ہیں۔ یہ ان کا ہندوستان کا چھٹا دورہ ہے۔

---------------

ہندوستان سماچار / عبدالسلام صدیقی