پاسنگ آوٹ پریڈ کے بعد فوج نے اس ایکٹ کو فوجی پروٹوکول اور قواعد کی خلاف ورزی سمجھا

نئی دہلی، 4 جون (ہ س)۔ فوج نے کیپٹن بھرت بھاردواج پر ناراضگی کا اظہار کیا ہے جنہوں نے مہاراشٹر کے ناسک میں پاسنگ آوٹ پریڈ کے بعد اپنی آرمی کی وردی پہن کر ہیلی کاپٹر کے سامنے اپنی گرل فرینڈ کو پرپوز کیا۔ فوج نے فوجی ہیلی کاپٹر کے سامنے گھٹنے ٹیکنے اور آروشی کی انگلی میں منگنی کی انگوٹھی پہنانے کو فوجی پروٹوکول اور قواعد کی خلاف ورزی سمجھا ہے۔ فوج نے سخت موقف اختیار کرتے ہوئے نوجوان افسر سے وضاحت طلب کی ہے۔

کیپٹن بھرت بھاردواج نے اپنی پرواز کی تربیت ناسک کے کمبیٹ آرمی ایوی ایشن ٹریننگ اسکول میں مکمل کی اور باضابطہ طور پر آرمی ایوی ایشن کے پائلٹ کے طور پر گریجویشن کیا۔ 2 جون کو پاسنگ آوٹ پریڈ کے دوران، نوجوان افسر، اپنی آرمی یونیفارم میں ملبوس، ایک ملٹری ہیلی کاپٹر کے سامنے گھٹنے ٹیک کر آروشی کو پرپوز کیا۔ جیسے ہی اس گہرے جذباتی لمحے کی ویڈیو سوشل میڈیا پر سامنے آئی، لوگوں نے فوجی کارنامے اور ذاتی زندگی کے اس حسین امتزاج کی تعریف کی۔ ویڈیو میں، آروشی اس تجویز کو قبول کرتے ہوئے نظر آ رہی ہیں، جب کہ آس پاس کے لوگ ان کی حوصلہ افزائی کر رہے ہیں۔

دفاعی ذرائع کے مطابق فوج نے فوجی وردیوں اور فوجی ہیلی کاپٹروں کے استعمال پر اعتراض کیا ہے کیونکہ سوشل میڈیا پر اس طرح کی ذاتی نمائش نامناسب ہے۔ بھارتی فوج نے وائرل ویڈیو کو بہت سنجیدگی سے لیا ہے اور نئے کمیشنڈ کیپٹن سے جواب طلب کیا ہے۔ سینئر افسران کا ماننا ہے کہ یہ رویہ فوجی احاطے کے استعمال اور فوجی اثاثوں کی نمائش کے حوالے سے قائم کردہ فوج کے کچھ اصولوں اور پروٹوکول کی خلاف ورزی کرتا ہے۔ جہاں افسران کو نوجوان افسر کی ذاتی خوشی پر کوئی اعتراض نہیں ہے، وہیں اس کی خوشی کے اظہار کے لیے جس جگہ کا انتخاب کیا گیا ہے اس پر سوالات اٹھائے جا رہے ہیں۔

کیپٹن بھرت بھاردواج نے بعد میں فوجی ہیلی کاپٹر میں سوار اپنی منگیتر کے ساتھ تصویر کھنچوائی۔ فوج اس بات کو یقینی بنانے کے بارے میں خاص طور پر چوکس ہے کہ سرکاری تقریبات یا فوجی ساز و سامان کا استعمال ایسے مواد کے لیے نہ کیا جائے جو بعد میں سوشل میڈیا پر وسیع پیمانے پر پھیل سکتا ہے۔ وردی بڑی عزت کی علامت ہے اور اس کے وقار کو برقرار رکھنا ہر افسر اور سپاہی کا فرض ہے۔

---------------

ہندوستان سماچار / عبدالسلام صدیقی