ہریدوار، 03 جون (ہ س)۔ وزیر اعلیٰ کی ہدایات پر ضلع ہریدوار میں ضلعی انتظامیہ نے بڑے پیمانے پرتجاوزات کے خلاف مہم چلائی۔ مہم کے تحت میونسپل کارپوریشن کے علاقے سے لے کر مختلف تحصیلوں تک سرکاری زمینوں، سڑکوں، فٹ پاتھوں اور نالیوں پر قائم تجاوزات کو ہٹایا گیا۔

میونسپل کارپوریشن اور ضلعی انتظامیہ کی مشترکہ ٹیم نے للتارو پل سے اپر روڈ تک مہم چلا کر سڑک اور نالیوں پر قائم 80 سے زائد عارضی تجاوزات کو ہٹا دیا۔

مہم کے دوران بعض تاجروں نے مخالفت کی کوشش کی، تاہم پولیس انتظامیہ کے تعاون سے کارروائی کامیابی کے ساتھ مکمل کر لی گئی۔ اس موقع پر سٹی مجسٹریٹ ہرگیری، ڈپٹی میونسپل کمشنر دیپک گوسوامی، صفائی انسپکٹر دھیریندر سیموال سمیت انتظامیہ، پولیس اور میونسپل کارپوریشن کی ٹیمیں موجود رہیں۔

روڑکی علاقے میں جوائنٹ مجسٹریٹ دیپک رام چندر سیٹھ کی قیادت میں کلیئر سے دھنوری تک اتر پردیش محکمہ آبپاشی کی زمین پر کارروائی کی گئی۔ اس دوران 200 سے زائد غیر قانونی ریڑھیاں، ٹھیلے اور کھوکھے ہٹا دیے گئے جبکہ تین مستقل تجاوزات کو منہدم کر دیا گیا۔

ادھر لکسَر بازار میں سب ڈویژنل مجسٹریٹ انل شکلا کی نگرانی میں سڑک کنارے، فٹ پاتھوں اور نالیوں پر قائم تجاوزات کو ہٹایا گیا۔ اس دوران پانچ افراد کے چالان بھی کیے گئے۔

تحصیل بھگوان پور میں سب ڈویژنل مجسٹریٹ دیویندر سنگھ نیگی نے لاؤڈ اسپیکر کے ذریعے لوگوں کو خود تجاوزات ہٹانے کی وارننگ دی ہے۔ انتظامیہ نے واضح کیا ہے کہ اگر تجاوزات نہ ہٹائی گئیں تو جمعرات سے بھگوان پور علاقے میں بھی انسدادِ تجاوزات مہم شروع کر دی جائے گی۔

ہندوستھان سماچار

---------------

ہندوستان سماچار / عبدالواحد