ادے پور، 29 جون (ہ س)۔ کمیونسٹ پارٹی آف انڈیا (مارکسسٹ) کی پولٹ بیورو کی سابق رکن اور سابق ایم پی برندا کرات نے رام مندر ٹرسٹ کو تحلیل کرنے اور مبینہ مالی بے ضابطگیوں کے ذمہ دار عہدیداروں کے خلاف کارروائی کا مطالبہ کیا۔
ادے پور کے مچھلا ماگرا میں پارٹی دفتر میں میڈیا سے بات کرتے ہوئے انہوں نے الزام لگایا کہ رام مندر سے متعلق مبینہ 200 کروڑ روپے، سونا، چاندی اور دیگر جائیدادوں کے معاملے میں صرف نچلے درجے کے ملازمین کے خلاف ایف آئی آر درج کر کے لیپاپوتی کی جا رہی ہے، جبکہ ٹرسٹ کے چیئرمین، سیکرٹری اور دیگر عہدیداروں کا احتساب نہیں کیا جا رہا ہے۔
ادے پور کے دورے پر آئیں کرات نے راجستھان میں جنگلات کے حقوق کے قانون کے موثر نفاذ کا مسئلہ اٹھاتے ہوئے کہا کہ قبائلیوں کے زمینی حقوق کو نظر انداز کیا جا رہا ہے۔ انہوں نے دعویٰ کیا کہ ادے پور ضلع میں 22,000 سے زیادہ دعووں میں سے صرف 43 فیصد کا ہی تصفیہ ہوا ہے اور جلد ہی اس مسئلہ پر ایک بڑی تحریک شروع کی جائے گی۔
انہوں نے منریگا کو مو¿ثر طریقے سے نافذ کرنے، دیہی خاندانوں کو 125 دن کا روزگار فراہم کرنے اور اس بات کو یقینی بنانے کا مطالبہ کیا کہ مرکزی حکومت تمام اخراجات برداشت کرے۔ ایک دیہی علاقے کے دورے کا حوالہ دیتے ہوئے، انہوں نے کہا کہ انٹرنیٹ کی خرابی کی وجہ سے، کارکن اپنی حاضری رجسٹر کرنے سے قاصر تھے اور انہیں بغیر اجرت کے واپس جانا پڑا۔
پریس کانفرنس کے دوران، انہوں نے مرکزی حکومت کی خارجہ پالیسی، گریٹ نکوبار پروجیکٹ، بدعنوانی، عوامی نمائندوں کی ہارس ٹریڈنگ اور این ای ای ٹی سے متعلق مسائل پر اپنی پارٹی کا موقف پیش کیا۔ سی پی آئی (ایم) کے ضلع سکریٹری ایڈوکیٹ راجیش سنگھ نے خیرمقدم کیا۔ کانفرنس میں شمشیر خان، شرون اور پروفیسر ہیمیندر چنڈالیا سمیت دیگر موجود تھے۔
---------------
ہندوستان سماچار / عبدالسلام صدیقی
