نئی دہلی،29 جون (ہ س)۔ ٹیکنالوجی پر مبنی انشورنس ڈسٹری بیوشن پلیٹ فارم چلانے والی کمپنی ٹرٹل منٹ فنٹیک سولیوشنز کے حصص نے آج اسٹاک مارکیٹ میں کمزوری کے ساتھ داخل ہو کر اپنے آئی پی او سرمایہ کاروں کو مایوس کیا۔ کمپنی کے حصص آئی پی او کے تحت 152 روپے کی قیمت پر جاری کیے گئے تھے۔ آج اس کی لسٹنگ بی ایس ای پر 10.39 فیصد رعایت کے ساتھ 136.20 روپے کی سطح پر اور این ایس ای پر 11.25 فیصد رعایت کے ساتھ 134.90 روپے کی سطح پر ہوئی۔ لسٹنگ کے بعد، خرید کی حمایت سے اسٹاک میں 144.95 روپے تک اضافہ ہوا۔لیکن بعد میں فروخت کے دباو کی وجہ سے اسٹاک میں 132 روپے کی کم ترین سطح پر گر اوٹ درج کی گئی۔ کمپنی کے حصص نے دن کی تجارت بی ایس ای پر 135.40 روپے اور این ایس ای پر 135.37 روپے پر بند کی۔ اس طرح ٹریڈنگ کے پہلے دن کمپنی کے آئی پی او سرمایہ کاروں کو 10.9 فیصد سے زیادہ کا نقصان ہوا۔

ٹرٹل منٹ فنٹیک سولیوشنز کا 882.67 کروڑ روپے کا آئی پی او 19 اور 23 جون کے درمیان سبسکرپشن کے لیے کھلا تھا۔ آئی پی او کو سرمایہ کاروں کی طرف سے ہلکا ردعمل ملا، جس کے نتیجے میں اسے مجموعی طور پر 1.24 گنا سبسکرائب کیا گیا۔ اہل ادارہ جاتی خریداروں (کیو آئی بی) کے لیے مخصوص حصے کو 1.63 گنا سبسکرائب کیا گیا۔ اسی طرح غیر ادارہ جاتی سرمایہ کاروں (این آئی آئی) کے لیے مخصوص حصے کو صرف 0.55 گنا سبسکرائب کیا گیا۔ اسی طرح، خوردہ سرمایہ کاروں کے لیے مخصوص حصے کو 1.11 گنا سبسکرائب کیا گیا۔ اس آئی پی او کے تحت 1 روپے کی فیس ویلیو کے ساتھ کل 660.72 کروڑ روپے کے نئے حصص جاری کیے گئے ہیں۔ مزید یہ کہ پیشکش برائے فروخت ونڈو کے ذریعے 1.46 کروڑ حصص فروخت کیے گئے ہیں۔ کمپنی آئی پی او میں نئے حصص کی فروخت سے اکٹھا ہونے والی رقم کو کلاوڈ اور سرور انفراسٹرکچر بنانے، لیز کی ادائیگی کرنے اور عام کارپوریٹ مقاصد کے لیے استعمال کرے گی۔

کمپنی کی مالی صحت کے بارے میں بات کرتے ہوئے، جیسا کہ کیپٹل مارکیٹ ریگولیٹر سیبی کو پیش کردہ ریڈ ہیرنگ پراسپیکٹس (ڈی آر ایچ پی) کے مسودے میں دعوی کیا گیا ہے، اس کی مالی صحت میں اتار چڑھاو رہا ہے۔ مالی سال 2022-23 میںکمپنی کو 288.18 روپے کا خالص نقصان ہواتھا۔ اگلے مالی سال 2023تا2024 میں 193.35 کروڑ روپے اور مالی سال 2024تا2025 میں 194.11 کروڑ روپے تک پہچ گیا۔ گزشتہ مالی سال 2025تا2026 میں، اپریل سے 31 دسمبر 2025 تک، کمپنی کو 187.39 کروڑ روپے کا خالص نقصان ہوا تھا۔

اس عرصے کے دوران کمپنی کی آمدنیمیں بھی اتار چڑھاو آیا۔ اسے مالی سال 2022تا2023 میں 460.11 کروڑ روپے کی کل آمدنی حاصل ہوئی، جو مالی سال 2023تا2024 میں کم ہو کر 119.12 کروڑ روپے رہ گئی اور مالی سال 2024تا2025 میں بڑھ کر 693.21 کروڑ روپے ہو گئی۔ گزشتہ مالی سال 2025تا2026 میں، اپریل سے 31 دسمبر 2025 تک، کمپنی کو 748.91 کروڑ روپے کی آمدنی حاصل ہوئی تھی۔

---------------

ہندوستان سماچار / عبدالسلام صدیقی