نئی دہلی، 29 جون (ہ س)۔ بھارتیہ جنتا پارٹی (بی جے پی) کے قومی جنرل سکریٹری ترون چگ نے پیر کو راجیہ سبھا کے رکن کے طور پر حلف لیا۔ راجیہ سبھا کے چیئرمین سی پی رادھا کرشنن نے انہیں ایوان میں عہدے اور رازداری کا حلف دلایا۔ انہوں نے مدھیہ پردیش سے بلامقابلہ منتخب ہونے کے بعد ایوان بالا کے رکن کا عہدہ سنبھالا۔ ان کے ساتھ چھ دیگر نو منتخب اراکین نے بھی حلف لیا۔
حلف برداری کی تقریب سے پہلے ترون چگ نے پارلیمنٹ ہاو¿س کے دروازے پر سجدہ ریز ہو کر جمہوریت کے اس سپریم مندر کے لیے اپنی عقیدت کا اظہار کیا۔ اس سے قبل انہوں نے نئی دہلی کے گرودوارہ رکاب گنج صاحب میں سجدہ ریز ہو کر آشیرواد حاصل کیا تھا۔
قابل ذکر ہے کہ ترون چگ مدھیہ پردیش سے راجیہ سبھا کے لیے بلا مقابلہ منتخب ہوئے تھے۔ انہوں نے 11 جون 2026 کو اپنا انتخابی سرٹیفکیٹ حاصل کیا تھا۔ حلف برداری کے ساتھ ہی انہوں نے اپنے پارلیمانی فرائض کی انجام دہی کا باقاعدہ آغاز کر دیا ہے۔
بی جے پی کے ایک سینئر لیڈر ترون چ±گ اس وقت پارٹی کے قومی جنرل سکریٹری کے طور پر کام کر رہے ہیں۔ امرتسر، پنجاب سے تعلق رکھنے والے چگ طویل عرصے سے تنظیمی سیاست میں سرگرم ہیں۔ انہوں نے اپنی عوامی زندگی کا آغاز چھوٹی عمر میں ہی راشٹریہ سویم سیوک سنگھ (آر ایس ایس) میں شمولیت سے کیا اور بعد میں اکھل بھارتیہ ودیارتھی پریشد (اے بی وی پی) میں فعال کردار ادا کیا۔ 1989 سے 1994 تک، انہوں نے ضلع سکریٹری اور اے بی وی پی کے ریاستی ایگزیکٹو کمیٹی کے رکن کے طور پر خدمات انجام دیں۔
1993 میں، وہ امرتسر میں بھارتیہ جنتا یوا مورچہ (بی جے وائی ایم) کے ضلعی صدر بن گئے۔ بعد ازاں، انہوں نے پنجاب بی جے وائی ایم کے ریاستی صدر اور قومی ایگزیکٹو کمیٹی کے رکن کی حیثیت سے ذمہ داریاں بھی نبھائیں۔ نوجوانوں کو تنظیم سے جوڑنے کے مقصد کے ساتھ، انہوں نے 2,100 کلو میٹر طویل 'یووا چیتنا یاترا' کی قیادت کی۔
بی جے پی تنظیم کے اندر، وہ ریاستی سکریٹری، پنجاب بی جے پی کے جنرل سکریٹری اور فی الحال، قومی جنرل سکریٹری سمیت کئی اہم ذمہ داریاں نبھا چکے ہیں۔ فی الحال، وہ جموں و کشمیر، لداخ، تلنگانہ اور انڈمان اور نکوبار کے پارٹی انچارج کے طور پر خدمات انجام دے رہے ہیں۔ اس کے علاوہ، انہیں دہلی بی جے پی کا شریک انچارج مقرر کیا گیا ہے۔ تنظیمی توسیع، انتخابی حکمت عملی اور بوتھ مینجمنٹ میں ان کے فعال کردار کی وجہ سے انہیں پارٹی کے اہم حکمت کاروں میں شمار کیا جاتا ہے۔
---------------
ہندوستان سماچار / عبدالسلام صدیقی
