دربھنگہ، 28 جون (ہ س)۔ بہار میں دربھنگہ ضلع کے کمتول تھانہ علاقے کے بریول چوک علاقے میں اتوار کی رات محرم کے موقع پر تعزیہ اور پہلوم تقریب کے بعد کشیدگی پھیل گئی۔بدمعاشوں نے کئی گھروں، دکانوں پر حملہ کیا اور توڑ پھوڑ کی۔ اس واقعے میں کم از کم چھ افراد زخمی ہوئے۔ پولیس نے چھ بدمعاشوں کو گرفتار کر لیا۔ الزام ہے کہ حملے کے دوران کئی گھروں کو نشانہ بنایا گیا۔ کشیدگی کے پیش نظر گاؤں میں پولیس کی اضافی نفری تعینات کر دی گئی ہے۔

عینی شاہدین کے مطابق رات کچھ افراد نے بریول چوک اور اطراف کے علاقوں میں ہنگامہ آرائی کی۔ بدمعاشوں نے کئی گھروں اور دکانوں میں توڑ پھوڑ کی، مندر کی چہار دیواری کو نقصان پہنچایا، دکان کی کھڑکیوں کو توڑ دیا اور علاقے میں نصب سی سی ٹی وی کیمروں کو نقصان پہنچایا۔واقعے کے دوران راستے میں آنے والے لوگوں پر حملہ کیا گیا۔اطلاع ملنے پر پولیس نے پہنچ کر حالات کو قابو میں کیا۔ زخمیوں کو ابتدائی طبی علاج کے بعد جیل ریفر کر دیا گیا۔ پولیس نے چھ بدمعاشوں کو گرفتار اور دیگر کی گرفتاری کے لیے چھا پہ ماری کی۔

پولیس کے مطابق یہ واقعہ تقریباً چار سال قبل ہونے والی بین المذاہب لومیرج سے متعلق تنازعہ کا نتیجہ ہے۔ بتایا گیا ہے کہ زیر بحث نوجوان محرم کی تقریبات کے مقام پر پہنچا، جہاں اس کا کچھ لوگوں سے جھگڑا اور ہاتھا پائی ہوئی۔ اس کے بعد کچھ لوگ اسے اس کے گاؤں میں تلاش کرنے گئے، جس کے نتیجے میں تشدد اور توڑ پھوڑ کی گئی۔

شبیندر کمار سمن (ایس ڈی پی او کمتول) نے بتایا کہ بریول اور آس پاس کے علاقوں میں صورتحال فی الحال قابو میں ہے۔ انتظامیہ نے عوام سے امن اور ہم آہنگی برقرار رکھنے کی اپیل کی ہے اور واضح کیا ہے کہ واقعے میں ملوث تمام افراد کے خلاف سخت قانونی کارروائی کی جائے گی۔

ہندوستھان سماچار

ہندوستان سماچار / Mohammad Afzal Hassan