علی گڑھ, 24 جون (ہ س) مسافروں کی حفاظت اور ٹرینوں کی بروقت و محفوظ آمد و رفت کو یقینی بنانے کے لیے شمالی وسطی ریلوے کے پریاگ راج ڈویژن کی جانب سے ریلوے ٹریک غیر قانونی طور پر عبور کرنے والوں کے خلاف خصوصی مہم مسلسل جاری ہے۔ ڈویژن کے شعبۂ تعلقاتِ عامہ کے افسر امیت کمار سنگھ نے میڈیا کو دی گئی معلومات میں بتایا کہ ریلوے ٹریک پار کرنا نہ صرف قانوناً جرم ہے بلکہ انسانی جان کے لیے بھی انتہائی خطرناک عمل ہے، جس سے حادثات اور ریل آپریشن متاثر ہونے کا خدشہ رہتا ہے۔

انہوں نے بتایا کہ ریلوے ایکٹ کے تحت بغیر اجازت ریلوے ٹریک عبور کرنے پر جرمانے اور قانونی کارروائی کی گنجائش ہے۔ یکم جنوری 2026 سے 21 جون 2026 تک چلائی گئی خصوصی مہم کے دوران پریاگ راج ڈویژن میں 973 افراد کو ٹریس پاسنگ کے الزام میں گرفتار کرکے ان کے خلاف قانونی کارروائی کی گئی۔

اعداد و شمار کے مطابق جنوری میں 131، فروری میں 109، مارچ میں 259، اپریل میں 164، مئی میں 227 اور جون میں 83 افراد کو گرفتار کیا گیا۔ اسٹیشن وار کارروائی میں پریاگ راج جنکشن 124 گرفتاریوں کے ساتھ سرفہرست رہا، جبکہ کانپور سینٹرل 107، چنار 99، پریاگ راج چھیوکی 70، فتح پور 64 اور علی گڑھ میں 47 افراد کے خلاف کارروائی عمل میں لائی گئی۔

امیت کمار سنگھ نے عوام سے اپیل کی کہ وہ کسی بھی صورت میں ریلوے ٹریک عبور نہ کریں اور ایک پلیٹ فارم سے دوسرے پلیٹ فارم تک جانے کے لیے صرف فٹ اوور برج، سب وے یا دیگر مقررہ محفوظ راستوں کا استعمال کریں۔ انہوں نے کہا کہ معمولی سی جلد بازی بھی کسی بڑے حادثے کا سبب بن سکتی ہے۔

انہوں نے مزید کہا کہ پریاگ راج ڈویژن محفوظ، سہل اور وقت کی پابند ریلوے خدمات فراہم کرنے کے لیے پُرعزم ہے اور اس مقصد کے حصول میں عوامی تعاون نہایت ضروری ہے۔

---------------

ہندوستان سماچار / سید کامران علی گڑھ