علی گڑھ, 24 جون (ہ س) ضلع جیل علی گڑھ میں بند ایک سزا یافتہ قیدی کی جانب سے جیل انتظامیہ پر سنگین الزامات عائد کیے جانے کے بعد معاملہ بحث کا موضوع بن گیا ہے۔ سوشل میڈیا پر ایک آڈیو وائرل ہو رہی ہے جس میں قیدی جیل کے ایک دروغہ پر مارپیٹ، ہراسانی اور رقم چھیننے جیسے الزامات لگا رہا ہے۔

وائرل آڈیو کے مطابق بلندشہر کا رہائشی قیدی ٹیٹو جیل کے پی سی او سے اپنے بھائی سندیپ کو فون کرتا ہے اور روتے ہوئے دعویٰ کرتا ہے کہ جیل کے دروغہ سنجے یادو نے اس کے پیسے لے لیے۔ جب اس نے رقم واپس مانگی تو مبینہ طور پر اس کی پٹائی کی گئی۔ آڈیو میں قیدی نے اپنی جان کو خطرہ ظاہر کرتے ہوئے یہ بھی کہا کہ اگر اس کی موت ہو جائے تو اس کی آخری رسومات اس کی بیٹی کے ہاتھوں ادا کی جائیں۔

قیدی کے بھائی سندیپ کا کہنا ہے کہ اسے منگل کی صبح جیل کے پی سی او نمبر سے فون موصول ہوا تھا، جس میں اس کا بھائی کافی خوفزدہ نظر آ رہا تھا۔ اس کے مطابق جب وہ جیل میں ملاقات کے لیے پہنچا تو اسے اندر جانے کی اجازت نہیں دی گئی۔

دوسری جانب جیل سپرنٹنڈنٹ پنکج کمار سنگھ نے قیدی کے الزامات کو بے بنیاد قرار دیا ہے۔ ان کا کہنا ہے کہ قیدی کی من مانی اور نظم و ضبط کی خلاف ورزی کے باعث اس کی بیرک تبدیل کی گئی تھی۔ انہوں نے دعویٰ کیا کہ قیدی نے پہلے اپنے اہل خانہ سے گفتگو ریکارڈ کرانے کو کہا اور اس کے بعد جیل انتظامیہ کے خلاف جھوٹے الزامات عائد کیے۔

فی الحال وائرل آڈیو کی صداقت اور قیدی کے الزامات کی حقیقت جاننے کے لیے معاملے کی جانچ کی جا رہی ہے۔

---------------

ہندوستان سماچار / سید کامران علی گڑھ