علی گڑھ، 24 جون (ہ س)۔

علی گڑھ کوتوالی اِگلاس علاقے کے ایک گاؤں میں نابالغ لڑکے سے مبینہ تعلقات کے معاملے نے نیا رخ اختیار کر لیا ہے۔ پولیس نے 17 سالہ لڑکے کے اہل خانہ کی شکایت پر ایک خاتون کے خلاف مقدمہ درج کرکے اسے گرفتار کر لیا اور عدالت میں پیش کرنے کے بعد جیل بھیج دیا۔ خاتون کا کہنا ہے کہ اس کے اپنے پڑوس میں رہنے والے ایک نوجوان سے کافی عرصے سے تعلقات تھے اوراسی سلسلے میں وہ انصاف کے لیے پولیس اور اعلیٰ حکام کے چکر لگا رہی تھی۔ خاتون کے مطابق شوہر نے اسے گھر سے نکال دیا جبکہ نوجوان کے اہل خانہ نے بھی اسے قبول کرنے سے انکار کر دیا۔

دوسری جانب نابالغ لڑکے کے اہل خانہ کا الزام ہے کہ خاتون نے ان کے بیٹے کو اپنے اثر میں لے کر اس کے ساتھ ناجائز تعلقات قائم کیے۔ ان کا کہنا ہے کہ لڑکا نابالغ ہے اورخاتون رشتے میں اس کی چچی لگتی ہے۔ معاملے کے دوران ایک آڈیو بھی سوشل میڈیا پر وائرل ہوئی ہے، جس میں خاتون اور ایک پولیس افسر کے درمیان گفتگو ہونے کا دعویٰ کیا جا رہا ہے۔ آڈیو میں خاتون اپنی شکایت پر کارروائی نہ ہونے پر ناراضگی ظاہر کرتے ہوئے اعلیٰ سطح پر احتجاج کی بات کرتی سنائی دے رہی ہے۔ اِگلاس کوتوالی انچارج ڈی کے سسودیا کے مطابق نابالغ لڑکے کے اہل خانہ کی شکایت پر قانونی کارروائی کی گئی ہے اور معاملے کی مزید تفتیش جاری ہے۔ واقعہ علاقے میں موضوعِ بحث بنا ہوا ہے اور لوگ پولیس تحقیقات اورعدالتی کارروائی پر نظر رکھے ہوئے ہیں۔

ہندوستھان سماچار

ہندوستان سماچار / سید کامران علی گڑھ