نئی دہلی، 23 جون (ہ س)۔ دہلی-این سی آر میں منگل کو تیز ہواوں کے ساتھ بارش کی وجہ سے یہاں کے لوگوں کو چلچلاتی دھوپ اور گرمی سے راحت ملی۔ علاقے میں اگلے دو دنوں تک مطلع جزوی طور پر ابر آلود رہے گا - بدھ سے جمعرات اور جمعہ کو موسم کا انداز دوبارہ تبدیل ہو جائے گا اور گرج چمک کے ساتھ ہلکی بارش کا امکان ہے۔

ہندوستانی محکمہ موسمیات (آئی ایم ڈی) کے مطابق، 24 جون بدھ کو جزوی طور پر ابر آلود رہے گا۔ اس دن زیادہ سے زیادہ اور کم سے کم درجہ حرارت بالترتیب 39سے41 ڈگری سیلسیس اور 26سے28 ڈگری سیلسیس کے درمیان رہنے کا امکان ہے۔ 25 جون کو بھی صورتحال ایسی ہی رہنے کا امکان ہے۔ 26 جون کو موسم کا انداز دوبارہ بدل جائے گا اور تیز ہواوں اور گرج چمک کے ساتھ ہلکی بارش متوقع ہے۔ اس دن کا زیادہ سے زیادہ اور کم سے کم درجہ حرارت بالترتیب 39سے41 ڈگری سیلسیس اور 27سے29 ڈگری سیلسیس کے درمیان رہنے کا امکان ہے۔

محکمہ موسمیات کے مطابق، جنوب مغربی مانسون آج مہاراشٹر (بشمول ممبئی)، باقی تلنگانہ اور اڈیشہ اور چھتیس گڑھ، جھارکھنڈ اور بہار کے کچھ اور حصوں میں آگے بڑھ گیا ہے۔ مانسون کے گجرات، مہاراشٹر، چھتیس گڑھ اور مدھیہ پردیش کے کچھ حصوں میں اگلے 2سے3 دنوں کے دوران، جھارکھنڈ، بہار کے دیگر حصوں اور اتر پردیش کے کچھ حصوں میں 3سے4 دنوں کے دوران آگے بڑھنے کے لیے حالات سازگارہیں۔ اس ہفتے مغربی ساحل، شمال مشرقی ہندوستان اور ذیلی ہمالیائی مغربی بنگال اور سکم میں بھاری بارش (7سے20 سینٹی میٹر) کا امکان ہے۔ اس دوران بعض علاقے گرمی کی زد میں رہیں گے۔ ان میں مشرقی اتر پردیش، ودربھ علاقہ، جنوب مشرقی مدھیہ پردیش اور بہار شامل ہیں۔

آئی ایم ڈی کے مطابق، ہریانہ، چنڈی گڑھ، دہلی اور پنجاب میں 24سے26 جون، مغربی اتر پردیش میں 24 اور 29 جون، مشرقی اتر پردیش میں 24سے28 جون اور مشرقی اور مغربی راجستھان میں 24سے29 جون کو الگ الگ بارش کا امکان ہے۔ اس مدت کے دوران، چھتیس گڑھ، مشرقی مدھیہ پردیش، مغربی مدھیہ پردیش اور وسطی ہندوستان میں ودربھ میں الگ الگ مقامات پر بارش متوقع ہے۔

اگلے چھ دنوں کے دوران مغربی ہندوستان میں کونکن، گوا، وسطی مہاراشٹر اور مراٹھواڑہ میں شدید بارش کا امکان ہے۔ اس کے ساتھ ہی، تامل ناڈو، پڈوچیری، کرائیکل، کرناٹک، ساحلی آندھرا پردیش، جنوبی جزیرہ نما ہندوستان کے یانم اور رائلسیما میں اگلے چھ دنوں کے دوران بارش کی وجہ سے موسم خوشگوار رہے گا۔ ان میں سے کچھ علاقوں میں تیز بارش اور طوفانی ہوائیں چلنے کے امکانات ہیں۔ ان ریاستوں کے کچھ اور حصے گرمی کی لہر کی زد میں رہنے کا امکان ہے۔ ان میں سے کچھ ریاستوں میں بہار اور جنوب مشرقی مدھیہ پردیش شامل ہیں جہاں گرمی کی لہر جاری رہے گی۔ اس کے ساتھ ہی جھارکھنڈ کے کچھ علاقوں میں رات کے گرم حالات برقرار رہنے کا قوی امکان ہے۔

---------------

ہندوستان سماچار / عبدالسلام صدیقی