مدھیہ پردیش کے ضلع سیہور کے اچھاور اور بھیروندا میں منعقدہ عوامی فلاحی کیمپ میں شامل ہوئے مرکزی وزیر زراعت

سیہور، 21 جون (ہ س)۔

مرکزی وزیر زراعت شیوراج سنگھ چوہان نے کہا ہے کہ حکومت کا مقصد آخری صف میں کھڑے شخص تک ترقی اور عوامی فلاح و بہبود کی اسکیموں کا فائدہ پہنچانا ہے۔ عوامی فلاحی کیمپوں کے ذریعے انتظامیہ خود عوام کے درمیان پہنچ کر ان کے مسائل حل کر رہی ہے۔

مرکزی وزیر زراعت چوہان اتوار کے روز مدھیہ پردیش کے ضلع سیہور کے اچھاور اور بھیروندا میں منعقدہ عوامی فلاحی کیمپ سے خطاب کر رہے تھے۔ اس موقع پر ریاست کے وزیر برائے محصول کرن سنگھ ورما بھی موجود تھے۔ مرکزی وزیر زراعت نے کیمپ میں عوامی چوپال لگا کر شہریوں کے مسائل سنے اور افسران کو ان کے فوری ازالے کی ہدایات دیں۔ اس کے ساتھ ہی انہوں نے کیمپ کا معائنہ کر کے مستفیدین میں امداد بھی تقسیم کی۔ کیمپ میں مختلف محکموں نے اپنے اسٹال لگا کر شہریوں کو حکومت کی عوامی فلاحی اسکیموں سے مستفید کیا۔ پروگرام میں مرکزی وزیر نے کہا کہ وزیر اعظم نریندر مودی اور وزیر اعلیٰ ڈاکٹر موہن یادو کی قیادت میں مرکز اور ریاستی حکومتیں غریبوں، کسانوں، مزدوروں، خواتین، نوجوانوں اور پسماندہ طبقات کی فلاح و بہبود کے لیے مسلسل کام کر رہی ہیں۔ کسانوں کی آمدنی بڑھانے، دیہی علاقوں میں روزگار کے مواقع پیدا کرنے اور بنیادی سہولیات کی توسیع کے لیے کئی اسکیمیں چلائی جا رہی ہیں۔

انہوں نے کہا کہ خریف کے سیزن کے لیے وافر مقدار میں کھاد دستیاب ہے اور کسانوں کو اس کی کمی نہیں ہونے دی جائے گی۔ انہوں نے کسانوں سے سوائل ہیلتھ کارڈ بنوانے اور مٹی میں جن اجزاء کی کمی ہو، اسی کے مطابق کھاد کا استعمال کرنے کی اپیل کی۔ انہوں نے کہا کہ حکومت مسلسل سڑکوں کے ذریعے گاوں میں ترقی کے دھارے کو آگے بڑھانے کا کام کر رہی ہے۔ انہوں نے وزیر اعظم رہائشی اسکیم (پی ایم آواس یوجنا) کے بارے میں کہا کہ اس اسکیم میں سب سے زیادہ درخواستیں موصول ہوئی ہیں۔ انہوں نے بتایا کہ رہائشی اسکیم کے لیے سروے کا کام مکمل ہو چکا ہے اور اب اہلیت کی جسمانی تصدیق کی جا رہی ہے۔ ضلع میں تقریباً 21 ہزار لوگوں کا سروے کیا گیا ہے۔ حکومت کی کوشش ہے کہ جن خاندانوں کے پاس رہنے کے لیے پکا مکان نہیں ہے، انہیں اسکیم کا فائدہ ملے اور کوئی بھی اہل شخص اس سے محروم نہ رہے۔

وزیر محصول کرن سنگھ ورما نے کہا کہ وزیر اعلیٰ ڈاکٹر یادو کی قیادت میں ریاستی حکومت گڈ گورننس، شفافیت اور عوامی خدمت کے جذبے کے ساتھ کام کر رہی ہے۔ حکومت کی منشا ہے کہ شہریوں کو اپنے مسائل کے حل کے لیے بار بار دفاتر کے چکر نہ لگانے پڑیں، بلکہ انہیں ایک ہی جگہ پر تمام ضروری خدمات اور اسکیموں کا فائدہ حاصل ہو۔ عوامی فلاحی کیمپ اسی سوچ کا نتیجہ ہیں۔ انہوں نے افسران کو ہدایت دی کہ موصول ہونے والی درخواستوں کا سنجیدگی سے جائزہ لے کر مقررہ وقت کے اندر ان کا ازالہ یقینی بنائیں۔ عوام کے مسائل کا حل ہی انتظامیہ کی اولین ذمہ داری ہے اور اس میں کسی بھی قسم کی لاپرواہی قبول نہیں کی جائے گی۔

پروگرام میں مرکزی وزیر زراعت شیوراج سنگھ چوہان نے پردھان منتری گرام سڑک یوجنا-4 کے تحت منظور شدہ 67 دیہی سڑکوں کے منظوری نامے متعلقہ گرام پنچایتوں کے سرپنچوں کو پیش کیے۔ ان میں اسمبلی حلقہ اچھاور کی 36 سڑکیں اور اسمبلی حلقہ بدھنی کی 31 سڑکوں کی تعمیر شامل ہے۔ اچھاور علاقے میں 106.37 کلومیٹر لمبی سڑکوں کی تعمیر پر تقریباً 82.77 کروڑ روپے خرچ کیے جائیں گے، جس سے 19 ہزار 692 سے زیادہ دیہی باشندوں کو آمد و رفت کی بہتر سہولت ملے گی۔ وہیں بدھنی علاقے میں 61.48 کلومیٹر لمبی 31 سڑکوں کی تعمیر کے لیے تقریباً 50.73 کروڑ روپے کی منظوری دی گئی ہے، جس سے 16 ہزار 269 دیہی باشندے مستفید ہوں گے۔ ان سڑکوں کی تعمیر سے دور دراز اور قبائلی بستیوں کا رابطہ اہم شاہراہوں سے جڑ جائے گا، دیہی علاقوں کے لوگوں کو تعلیم، صحت اور روزگار کے بہتر مواقع دستیاب ہوں گے اور خطے کی ہمہ جہت ترقی کو نئی رفتار ملے گی۔

مرکزی وزیر چوہان نے بھیروندا میں 28.53 کروڑ روپے کے ترقیاتی اور تعمیراتی کاموں کا سنگِ بنیاد اور افتتاح کیا۔ انہوں نے 16.59 کروڑ روپے کی لاگت والے 06 ترقیاتی کاموں کا افتتاح کیا اور 11.94 کروڑ روپے کی لاگت سے بننے والے ساندیپنی اسکول، بوائز اینڈ گرلز ہاسٹل اور گرلز آشرم کی تعمیراتی کام کا بھومی پوجن کیا۔ اس موقع پر انہوں نے لاڈلی لکشمی اسکیم کی بچیوں کو سرفراز کیا اور بھیروندا نگر پریشد کے چھ مستفیدین کو رہائشی حقوق کی دستاویزات سونپیں۔ انہوں نے سمبل اسکیم کے مستفیدین کو مالی امداد کے منظوری نامے پیش کیے۔ اس کے ساتھ ہی قومی دیہی روزگار مشن کے تحت سیلف ہیلتھ گروپس کو 6,00,000 روپے کے قرض کا منظوری خط بھی فراہم کیا۔ انہوں نے دیگر اسکیموں کے مستفیدین میں بھی امداد تقسیم کی۔

ہندوستھان سماچار

ہندوستان سماچار / انظر حسن