دوحہ ڈائمنڈ لیگ 2026 میں چوتھے نمبر پر رہے نیرج، دولتِ مشترکہ کھیلوں کے لیے کوالیفائی کیا

دوحہ، 20 جون (ہ س)۔ نیزہ پھینکنے والے ہندوستانی کھلاڑی نیرج چوپڑا نے تقریباً آٹھ ماہ بعد مسابقتی کھیل میں واپسی کرتے ہوئے جمعہ کی رات دوحہ ڈائمنڈ لیگ 2026 میں چوتھی پوزیشن حاصل کی۔ اگرچہ وہ تمغہ حاصل کرنے سے چوک گئے، لیکن انہوں نے دولتِ مشترکہ کھیل 2026 کے لیے مقررہ کوالیفیکیشن مارک پار کر لیا۔ 28 برس کے نیرج پیٹھ کی چوٹ کی وجہ سے طویل عرصے سے میدان سے باہر تھے۔ مقابلے میں ان کی پہلی کوشش فاول رہی، لیکن اس کے بعد انہوں نے تال حاصل کی اور تیسری کوشش میں 85.69 میٹر دور نیزہ پھینک کر تیسرے نمبر پر پہنچ گئے۔

اس کے بعد چوتھی کوشش میں انہوں نے 83.45 میٹر کا تھرو کیا۔ آخری مرحلے میں جگہ بنانے کے لیے انہیں پانچویں کوشش میں 86 میٹر سے زیادہ کا فاصلہ حاصل کرنا تھا، لیکن ان کی یہ کوشش بھی فاول ہو گئی اور وہ چوتھے نمبر پر کھسک گئے۔ اگرچہ نیرج اپنی واپسی کو یادگار جیت میں تبدیل نہیں کر سکے، لیکن ان کی بہترین کارکردگی 85.69 میٹر رہی، جو دولتِ مشترکہ کھیل 2026 کے کوالیفیکیشن معیار 82.61 میٹر سے بہتر تھی۔

مقابلے کا خطاب سری لنکا کے رومیش تھرنگا پتھیراگے نے 88.68 میٹر کے تھرو کے ساتھ جیتا۔ انہوں نے حال ہی میں روم ڈائمنڈ لیگ میں 92.62 میٹر کی شاندار کارکردگی کا مظاہرہ کیا تھا۔ دوسرے نمبر پر گریناڈا کے اینڈرسن پیٹرز رہے، جنہوں نے 86.38 میٹر کا تھرو کیا، جب کہ امریکہ کے کرٹس تھامسن نے 85.99 میٹر کے ساتھ تیسری پوزیشن حاصل کی۔ دوحہ میں نیرج کی واپسی ہندوستانی ایتھلیٹکس کے لیے ایک مثبت اشارہ مانی جا رہی ہے اور اب ان کی نظریں آئندہ بین الاقوامی مقابلوں میں بہتر کارکردگی پر ہوں گی۔

ہندوستھان سماچار

------------

ہندوستان سماچار / انظر حسن