ناروے شطرنج : پرگیانانند نے علی رضا فیروزجا کو ہرایا، ویسلے سو ٹاپ پر برقرار

اوسلو 2 جون (ہ س)۔ ناروے شطرنج 2026 کے ساتویں راونڈ میں سنسنی اپنے عروج پر رہی۔ اس راونڈ میں ایک مقابلے کا فیصلہ کلاسیکل شطرنج میں ہوا، جبکہ دو دیگر مقابلوں کا نتیجہ آرمگیڈن ٹائی بریکر سے نکلا۔ پیر کو کھیلے گئے ساتویں راونڈ میں دن کا سب سے بڑا الٹ پھیر ہندوستان کے نوجوان گرینڈ ماسٹر آر پرگیانانند نے کیا۔ انہوں نے کلاسیکل مقابلے میں علی رضا فیروزجا کو شکست دے کر خطابی دوڑ کو اور زیادہ دلچسپ بنا دیا۔

طویل وقت تک جاری رہنے والے سخت مقابلے میں پرگیانانند نے شاندار کھیل کا مظاہرہ کرتے ہوئے اپنی سبقت کو جیت میں بدل دیا۔ ٹورنامنٹ میں علی رضا فیروزجا کی یہ دوسری کلاسیکل شکست تھی۔ دنیا کے نمبر ایک کھلاڑی میگنس کارلسن اور ونسنٹ کیمر کے درمیان کلاسیکل مقابلہ ڈرا رہا۔ اس کے بعد ہوئے آرمگیڈن مقابلے میں کارلسن نے بازی مارتے ہوئے اضافی پوائنٹس حاصل کیے اور ٹاپ کھلاڑیوں پر دباو برقرار رکھا۔

وہیں موجودہ ورلڈ چیمپئن ڈی گوکیش اور ویسلے سو کے درمیان کلاسیکل مقابلہ برابری پر ختم ہوا۔ آرمگیڈن میں گوکیش نے جیت درج کر کے اہم اضافی پوائنٹس اپنے نام کیے ساتویں راونڈ کے بعد ویسلے سو 12.5 پوائنٹس کے ساتھ ٹیبل میں ٹاپ پر برقرار ہیں۔ علی رضا فیروزجا 10 پوائنٹس کے ساتھ دوسرے نمبر پر ہیں، جبکہ میگنس کارلسن، ونسنٹ کیمر اور آر پرگیانانند 9-9 پوائنٹس کے ساتھ خطاب کی دوڑ میں برقرار ہیں۔

ناروے شطرنج خواتین کے مقابلے میں بیبیسارا اساوبایوا نے شاندار کارکردگی کا مظاہرہ کرتے ہوئے اپنی سبقت کو اور زیادہ مضبوط کر لیا۔ سفید مہروں سے کھیلتے ہوئے انہوں نے ژو جنیر کو کلاسیکل مقابلے میں ہرا کر پورے 3 پوائنٹس حاصل کیے۔ مڈل گیم میں سبقت حاصل کرنے کے بعد انہوں نے پورے اعتماد کے ساتھ جیت کو یقینی بنایا۔

ہندوستان کی دیویا دیشمکھ اور کونیرو ہمپی کے درمیان کلاسیکل مقابلہ ڈرا رہا۔ تاہم، آرمگیڈن مقابلے میں دیویا نے کالے مہروں سے کھیلتے ہوئے جیت درج کی اور اضافی پوائنٹس حاصل کیے۔

دوسرے مقابلے میں موجودہ خواتین کی ورلڈ چیمپئن جو وینجن اور انا موزیچک کے درمیان کلاسیکل بازی برابری پر ختم ہوئی۔ اس کے بعد آرمگیڈن میں موزیچک نے جیت حاصل کر کے اہم اضافی پوائنٹس اپنے کھاتے میں جوڑے۔ ساتویں راونڈ کے بعد بیبیسارا اساوبایوا 12.5 پوائنٹس کے ساتھ پہلے نمبر پر ہیں، جبکہ دیویا دیشمکھ 10 پوائنٹس کے ساتھ دوسرے نمبر پر برقرار ہیں۔ انا موزیچک 9.5 پوائنٹس کے ساتھ تیسرے نمبر پر ہیں۔

ہندوستھان سماچار

---------------

ہندوستان سماچار / انظر حسن