خواتین سہ فریقی ٹی 20 سیریز : آئرلینڈ نے پہلی بار ویسٹ انڈیز کو ہرایا

ڈبلن 2 جون (ہ س)۔ آئرلینڈ کی خواتین ٹیم نے سہ فریقی ٹی20 سیریز میں تاریخ رقم کرتے ہوئے پیر کی دیر رات ویسٹ انڈیز کو ڈکورتھ-لوئس-اسٹرن (ڈی ایل ایس) طریقہ کار کے تحت ایک رن سے ہرا کر ٹی20 بین الاقوامی کرکٹ میں اپنی پہلی جیت درج کی۔ اس جیت کے ساتھ آئرلینڈ نے فائنل میں پہنچنے کی اپنی امیدوں کو بھی مضبوط کر لیا۔ میچ کی جیت میں کپتان اورلا پریینڈرگاسٹ نے کلیدی رول ادا کیا، جنہوں نے گیند اور بلے دونوں سے شاندار کارکردگی کا مظاہرہ کیا۔ پہلے انہوں نے دو وکٹیں حاصل کیں اور پھر ناٹ آوٹ 71 رن کی میچ وننگ اننگز کھیلی۔

پہلے بلے بازی کرتے ہوئے ویسٹ انڈیز کی شروعات انتہائی خراب رہی۔ ایوا کیننگ نے پاور پلے میں دو وکٹیں لے کر کیریبیائی ٹیم کو ابتدائی جھٹکے دیے۔ 5 اوور کے اندر ٹاپ آرڈر کے بلے باز پویلین لوٹ گئے اور ٹیم دباو میں آ گئی۔ صورتحال اس وقت اور خراب ہو گئی جب اسٹیفانی ٹیلر رن آوٹ ہونے کے بعد زخمی ہو کر ریٹائرڈ ہرٹ ہو گئیں۔ 10 اوور کے بعد ویسٹ انڈیز کا اسکور صرف 53/4 تھا اور ٹیم کو بڑے اسکور کے لیے ایک مضبوط شراکت داری کی ضرورت تھی۔

اس کے بعد جینیلیہ گلاسگو اور شیمین کیمپیبل نے اننگز کو سنبھالا۔ دونوں نے اہم شراکت داری کر کے ٹیم کو بحران سے نکالا۔ کیمپیبل کے آوٹ ہونے کے بعد پریینڈرگاسٹ نے ڈیتھ اوورز میں دو وکٹیں لے کر ویسٹ انڈیز کی رفتار پر بریک لگا دیا۔ نچلے آرڈر کے بلے بازوں کے کچھ مفید چوکوں کی بدولت ویسٹ انڈیز 20 اوور میں 141-8 تک پہنچنے میں کامیاب رہا۔

142 رنوں کے ہدف کا تعاقب کرنے اتری آئرلینڈ کی شروعات بھی خراب رہی۔ شونیشا ہیکٹر نے اننگز کی پہلی چار گیندوں میں ہی دونوں سلامی بلے بازوں کو آوٹ کر دیا۔

اس کے بعد کپتان پریینڈرگاسٹ نے مورچہ سنبھالا۔ اپنی 24 ویں سالگرہ پر انہوں نے شاندار بلے بازی کرتے ہوئے چوکوں کی جھڑی لگا دی۔ حالانکہ ویسٹ انڈیز نے درمیان میں مسلسل تین وکٹیں لے کر آئرلینڈ کو 65/5 کے اسکور پر مشکل میں ڈال دیا۔

لیکن پریینڈرگاسٹ ایک کنارے پر ڈٹی رہیں اور تیزی سے رن بناتی رہیں۔ 14 اوور کے بعد آئرلینڈ کا اسکور 95/5 تھا، جس میں اکیلے پریینڈرگاسٹ کے 71 رن شامل تھے۔ اس وقت ڈی ایل ایس حساب کے مطابق آئرلینڈ جیت سے صرف تین رن پیچھے تھا۔ اسی دوران بارش شروع ہو گئی۔ امپائروں نے ایک اور گیند پھینکنے کا فیصلہ کیا اور اس گیند پر لوئس لٹل نے کنارہ لے کر چوکا لگا دیا۔ اس کے بعد بارش تیز ہو گئی اور کھلاڑیوں کو میدان چھوڑنا پڑا۔ کھیل دوبارہ شروع نہیں ہو سکا اور ڈی ایل ایس قانون کے تحت آئرلینڈ کو 1 رن سے فاتح قرار دیا گیا۔

مختصر اسکور

ویسٹ انڈیز خواتین: 141/8 (20 اوور) جینیلیہ گلاسگو 36، شیمین کیمپیبل 31، اورلا پریینڈرگاسٹ 2/26، ایوا کیننگ 2/11

آئرلینڈ خواتین: 99/5 (14.1 اوور) اورلا پریینڈرگاسٹ 71*، شونیشا ہیکٹر 2/21

نتیجہ: آئرلینڈ خواتین ٹیم 1 رن سے کامیاب (ڈی ایل ایس طریقہ کار)۔

ہندوستھان سماچار

---------------

ہندوستان سماچار / انظر حسن