فیفا ورلڈ کپ 2026 کے بعد مینوئل نیور جرمنی کی ٹیم کو الوداع کہیں گے، ورلڈ کپ کو بتایا آخری ٹورنامنٹ

وینسٹن سیلم، 19 جون (ہ س)۔ جرمنی کے تجربہ کار گول کیپر مینوئل نیور نے جمعرات کو اعلان کیا ہے کہ وہ فیفا ورلڈ کپ 2026 کے بعد ایک بار پھر بین الاقوامی فٹ بال سے ریٹائرمنٹ لے لیں گے۔ 40 برس کے نیور نے واضح کیا کہ یہ ان کے کیریئر کا آخری بین الاقوامی ٹورنامنٹ ہوگا۔ سال 2014 میں جرمنی کو ورلڈ کپ جتوانے والے نیور مسلسل پانچویں ورلڈ کپ میں جرمنی کے اہم گول کیپر کے طور پر کھیل رہے ہیں۔ انہوں نے یورو 2024 میں جرمنی کی کوارٹر فائنل میں شکست کے بعد قومی ٹیم سے ریٹائرمنٹ لے لی تھی، لیکن کلب کی سطح پر شاندار کارکردگی کے بعد انہیں ورلڈ کپ کے لیے دوبارہ ٹیم میں شامل کیا گیا۔

نیور نے ایک پریس کانفرنس میں کہا، ’’میں نے 2024 میں صحیح وجوہات کی بنا پر بین الاقوامی فٹ بال چھوڑا تھا۔ گزشتہ دو برسوں تک مسلسل قومی ٹیم کے لیے کھیلنا میرے لیے جسمانی طور پر مشکل ہوتا۔ اب یہ طے ہے کہ یہ میرا آخری ٹورنامنٹ ہے۔ میں دو سال بعد ہونے والی اگلی یورو چیمپئن شپ میں نہیں کھیلوں گا۔‘‘ انہوں نے کہا کہ حالیہ دنوں میں انہوں نے یہ تسلیم کیا ہے کہ جرمنی کے لیے یہ ان کے آخری مقابلے ہوں گے، لیکن فی الحال ان کی پوری توجہ وداعی تقریب پر نہیں بلکہ ٹیم کی کارکردگی پر ہے۔

ورلڈ کپ سے پہلے گول کیپر اولیور بومن کو جرمنی کی پہلی پسند مانا جا رہا تھا، لیکن نیور کی واپسی کے بعد انہیں ابتدائی مقام ملا۔ انہوں نے دو سال بعد قومی ٹیم کے لیے پہلا میچ کھیلتے ہوئے کوراکاو کے خلاف 1-7 کی بڑی جیت میں حصہ لیا۔ نیور نے بتایا کہ ان کی اور بومن کی باہمی افہام و تفہیم بہت اچھی ہے اور دونوں ٹیم کے مفاد میں مل کر کام کر رہے ہیں۔

جرمنی اب اپنے اگلے گروپ مقابلے میں آئیوری کوسٹ سے ٹکرائے گا۔ اس میچ میں جیت جرمنی کو ناک آوٹ مرحلے میں پہنچا سکتی ہے۔ جرمن ٹیم گزشتہ دو ورلڈ کپ (2018 اور 2022) میں گروپ مرحلے سے باہر ہو گئی تھی۔ نیور نے کہا، ’’ہم گزشتہ ناکامیوں کے بارے میں نہیں سوچ رہے ہیں۔ ہمارا ہدف اگلا میچ جیتنا اور جلد ناک آوٹ میں جگہ بنانا ہے۔‘‘

انہوں نے یہ بھی کہا کہ اس عمر میں ایک اور ورلڈ کپ کھیلنا ان کے لیے کسی تحفے سے کم نہیں ہے۔ ساتھ ہی انہوں نے اعتراف کیا کہ اگر انہیں ورلڈ کپ جیتنے کا امکان نظر نہیں آتا، تو وہ یہاں موجود نہیں ہوتے۔

ہندوستھان سماچار

--------------

ہندوستان سماچار / انظر حسن