نئی دہلی، 19 جون (ہ س)۔

بورڈ آف کنٹرول فار کرکٹ ان انڈیا (بی سی سی آئی) نے جمعہ (19 جون) کو تصدیق کی کہ فاسٹ بولر ہرشیت رانا کو افغانستان کے خلاف تیسرے اور آخری ون ڈے کے لیے ہندوستانی ٹیم میں شامل کیا گیا ہے۔

ہرشیت رانا کچھ عرصے سے بی سی سی آئی سنٹر آف ایکسی لینس میں انجری کی بحالی سے گزر رہے تھے۔ اب انہیں مکمل فٹ قرار دیا گیا ہے اور وہ چنئی میں ہندوستانی ٹیم میں شامل ہو گئے ہیں۔ بھارت اور افغانستان کے درمیان تیسرا اور آخری ون ڈے 20 جون کو چنئی میں کھیلا جائے گا۔

24 سالہ ہرشیت رانا رواں سال کے ٹی ٹوئنٹی ورلڈ کپ سے قبل ایک پریکٹس میچ کے دوران گھٹنے کی انجری کا شکار ہو گئے تھے جس کے باعث وہ ٹورنامنٹ سے باہر ہو گئے تھے۔ محمد سراج کو ان کی جگہ ٹیم میں شامل کیا گیا۔ چوٹ نے انہیں انڈین پریمیئر لیگ (آئی پی ایل) 2026 میں شرکت کرنے اور کولکتہ نائٹ رائیڈرز کے لیے کھیلنے سے بھی روک دیا۔

تاہم، طویل بحالی کے بعد، رانا کو انگلینڈ اور آئرلینڈ کے خلاف ٹی 20 سیریز کے ساتھ ساتھ جاپان میں ایشین گیمز کے ممکنہ منصوبے میں شامل کیا گیا۔ اب، مسابقتی کرکٹ میں ان کی واپسی چنئی ون ڈے میں ہی ہو سکتی ہے، اگر انہیں پلیئنگ الیون میں موقع ملتا ہے۔

ہرشیت رانا نے نیوزی لینڈ کے خلاف T20 ورلڈ کپ سے قبل ہندوستان کے لیے اپنا آخری میچ کھیلا تھا۔ نیوزی لینڈ کے خلاف آخری ون ڈے میں انہوں نے نچلے آرڈر میں 43 گیندوں پر 52 رنز بنائے اور تین وکٹیں حاصل کیں۔ وہ اب تک 14 ون ڈے کھیل چکے ہیں۔انہوں نے ون ڈے میں 26 وکٹیں حاصل کیں۔

ہندوستان کو تین میچوں کی سیریز میں فی الحال 2-0 کی ناقابل تسخیر برتری حاصل ہے۔ ٹیم نے دھرم شالہ اور لکھنو¿ میں کھیلے گئے پہلے دو میچ جیتے تھے۔ سیریز کا تیسرا اور آخری میچ ہفتہ (20 جون) کو چنئی میں کھیلا جائے گا۔

افغانستان کے خلاف تیسرے ون ڈے کے لیے ہندوستانی اسکواڈ:

شبھمن گل (کپتان)، روہت شرما، شریس ائیر (نائب کپتان)، کے ایل راہل (وکٹ کیپر)، ایشان کشن (وکٹ کیپر)، نتیش کمار ریڈی، واشنگٹن سندر، کلدیپ یادو، ارشدیپ سنگھ، پرسدھ کرشنا، پرنس یادو،گرنور برابر ہرش دوبے یشسوی جائسوال ،ہرشیت رانا

ہندوستھان سماچار

ہندوستان سماچار / عطاءاللہ